Flickr (www.flickr.com) er án efa vinsælasta netsamfélagið (social network) í dag þar sem sérstaklega er sýslað með myndir. Flickr er enda kjörin leið fyrir alla þá sem vilja hýsa og gera aðgengilegar hvers kyns myndir á Netinu án mikils tilkostnaðar og skiptir þá ekki máli hvort um er að ræða persónulegar ljósmyndir, teikningar eða annað myndrænt efni. En Flickr býður auk þess upp á fjölda áhugaverðra möguleika sem m.a. gera kerfið að mjög öflugum samvinnuvettvangi í námi og kennslu.

Ágætt dæmi um samvinnu með aðstoð Flickr eru svo kallaðir hópar (groups) sem stofnaðir eru í kringum sérstakt málefni eða viðfangsefni, en hópar gera Flickr mörgum notendum kleift að safna saman myndum á einn stað og fjalla um þær sín á milli með einföldu umræðukerfi. Hvaða Flickr notandi sem er getur stofnað hóp og boðið öðrum notendum að taka þátt og deila með sér myndum. Ótal margir slíkir hópar hafa verið stofnaðir innan Flicker en hér ætla ég sérstaklega að vekja athygli á fuglavef einum þar sem allir þeir sem áhuga hafa á fuglum geta sent inn eigin myndir, skráð samhliða þeim margvíslegar upplýsingar, vísað á áhugaverðar heimildir og tekið þátt í umræðum.

Hópar í Flickr eru ekki einungis einföld leið til þess að halda úti öflugum samstarfsvettvangi á Netinu heldur afar spennandi möguleiki í námi og kennslu þar sem samvinna er oftar en ekki lykillinn að árangri. Með því að nýta Flickr er einfalt að stofna gagnvirka myndabanka þar sem nemendur og kennarar vinna saman að öflun og miðlun hvers kyns upplýsinga með það að markmiði að stuðla að aukinni þekkingu á skapandi og ekki síst afar skemmtilegan máta.

Sjálfsagt er að geta þess að Salvör Gissurardóttir, kennari við KHÍ, hefur sett saman og gert aðgengilegar á Netinu íslenskar leiðbeiningar með Flickr.