Elgg er að mínu viti eitt mest spennandi þróunarverkefni sem verið er að vinna að um þessar mundir á sviði hagnýtra netsamfélaga í námi og kennslu. Hönnuðir Elgg, þeir Ben Wedmuller og David Tosh, nota orðið “Learning landscape” yfir sköpunarverk sitt, sem beinast liggur við að þýða sem námslandslag á íslensku, en aðrar hugmyndir eru auðvitað vel þegnar.

Markmiðið með þróun Elgg er að skapa netbundinn, notendamiðaðan, félagslegan vettvang sem samþættir lausnir eins og vefdagbækur (blogg), ferlimöppur (e-portfolios) og wiki. Elgg býr einnig yfir helstu eiginleikum nútíma netsamfélaga þar sem hvatt er til samvinnu og samskipta með því að gera notendum kleift að tengjast hverjum öðrum og mynda sjálfstæða notendahópa. Notendur er ef til vill ekki rétta orðið í þessu sambandi, betra væri að segja meðlimir og mun ég reyna að nota það framvegis. Elgg er opið og skapandi umhverfi á Netinu sem gerir einsaka meðlimum kleift að móta eigin námsvettvang (learning space) og tengjast öðrum meðlimum með sömu eða svipuð áhugamál. Einstaka meðlimir geta síðan mynda að vild smærri eða stærri hópa, einskonar netbundin þekkingarsamfélög um afmarkaðri málefni. Elgg er við fyrstu sýn nokkuð keimlíkt hefðbundnum blogglausnum en samþætting ferlimappa og wiki gerir kerfið einstaklega aðlaðandi lausn í námi og kennslu.

Elgg grundvallast á þeirri hugmyndafræði að nám eigi sér ekki stað í tómarúmi og styrkur þess byggir ekki síst á samfélagsbundum þáttum sem kerfið styður við og örvar, s.s. samskiptum notenda sín á milli og sköpun og miðlun þekkingar með þeim verkfærum sem eru hluti af kerfinu.

ELGG er að sjálfsögðu opinn hugbúnaður. Ég segi að sjálfsögðu þar sem það hefur rækilega sýnt sig að sá óendanlegi sköpunarkraftur, hugmyndaauðgi og orka sem býr í opnum lausnum virðist margföld á við það sem lokaður séreignahugbúnaður sem ætlað er að þjóna hagsmunum nemenda og kennara hefur uppá að bjóða.

Þeir sem áhuga hafa á því að kynna sér eða nýta sér Elgg hafa um tvo kosti að velja. Í fyrsta lagi er hægt að skrá sig sem notanda á opin Elgg kerfi sem þegar hafa verið sett upp, s.s. á Elgg.net, það hef ég sjálfur gert og einnig Salvör Gissurardóttir. Í öðru lagi er einfaldlega hægt að sækja hugbúnaðinn og setja upp á eigin vefþjón og mynda þannig sjálfstætt samfélag áhugasamra notenda.

Það er einmitt síðarnefndi kosturinn sem heillar mig mjög mikið um þessar mundir, svo mikið að ég hef þegar hrint úr vör þróunarverkefni við Fjölbrautaskólann í Breiðholti þar sem ætlunin er að kanna kosti og galla Elgg í skólastarfi á framhaldsskólastigi. Elgg hefur þegar verið sett upp á vefþjón sem nýttur er til margvíslegs þróunarstarfs á vegum skólans, en innan FB hefur undanfarin ár verið lögð vinna í að kanna möguleika opins hugbúnaðar í skólastarfi. Þróunarstarf þetta hefur að stærstum hluta snúist um innleiðingu og notkun á Moodle námsstjórnunarkerfinu, en núna er s.s. verið að færa út kvíarnar og kanna fleiri spennandi möguleika (eins og Elgg) enda hefur reynslan af Moodle verið afar góð.

Svo ég lýsi aðeins stöðunni eins og hún er í dag þá hef ég tekið að mér að íslenska Elgg og hef verið að vinna að þeirri þýðingu yfir hátíðarnar. Ég geri ráð fyrir að íslensk þýðing á Elgg verði tilbúin og öllum aðgengileg þegar næsta útgáfa kemur út í janúar 2006. Eins og þegar hefur komið fram, hefur Elgg verið sett upp á vefþjón innan FB og mun kerfið verða notað í kennslu á nokkrum áföngum (fyrst og fremst á UT-braut) skólans á vorönn 2006. Ætlunin er samþætta notkun Elgg og Moodle en þess má geta að um þessar mundir er verið að vinna að tengingu á milli Moodle og Elgg (og reyndar annarra námsstjórnunarkerfa) sem mun án efa hafa í för með sér frekari “samvinnu” þessara tveggja frábæru lausna.

Ég hvet alla sem áhuga hafa á því að taka þátt í þessu þróunarverkefni með mér að hafa samband enda er það markmið mitt að leita allra leiða til þess að skapa sameiginlegt námslandslag fyrir íslenska grunn- og framhaldsskóla sem mun þá byggja á einni miðlægri uppsetningu á Elgg. Á næstu dögum mun ég viðra þessar hugmyndir mínar við Menntamálaráðuneytið, Menntagátt, Menntasvið Reykjavíkurborgar, aðila sem ég þekki innan íslenska skólakerfisins og aðra sem mig grunar að hafi áhuga á einmitt svona verkefni.

Sjálfsagt er að geta þess að félagi minn og samstarfsmaður Björgvin Þorsteinsson aðstoðaði mig lítillega við uppsetninguna á Elgg (m.ö.o. hann sá algjörlega um hana) og kann ég honum auðvitað miklar þakkir fyrir. Þegar unnið er að þróunarverkefnum á sviði upplýsingatækni er ómetanlegt að starfa með einstaklingum sem búa yfir bæði brennandi áhuga og mikilli tækniþekkingu.