sfjalar

Samkvæmt frétt á vef Reykjavíkurborgar frá 11. janúar sl. hefur Menntasvið borgarinnar samið við fyrirtækið Blackboard um kaup á samnefndu námsstjórnunarkerfi fyrir grunnskóla borgarinnar. Stefnt er að því að innleiða kerfið nú í vor og gangsetja þegar í byrjun sumars.

Ákvörðunin um kaup á Blackboard kerfinu var tekin í kjölfar úttektar upplýsingatæknideildar sem tók víst hálft annað ár. Í úttektinni voru nokkrar lausnir voru skoðaðar, eins og það er orðað, og niðurstaðan sú að BlackBoard þótti öðrum fremri. Er hugbúnaðinum ætlað að skapa nýjan grundvöll fyrir fjarkennslu í grunnskólum borgarinnar.

Satt best að segja kemur þessi tilkynning frá menntasviði mjög á óvart og satt best að segja þá vakna fjölmargar spurningar við lestur hennar. Ég vil taka það fram að ég er sérstakur áhugamaður um opinn og frjálsan hugbúnað sem hugsanlega skýrir afstöðu mína. Fyrst og fremst hef ég þó hagsmuni nemenda og kennara í huga (og auðvitað allra borgarbúa sem í sameiningu bera kostnaðinn af þessu framtaki). Hér á eftir fara fyrstu viðbrögð mín:

Blackboard er í mjög takmarkaðri notkun hér á landi (veit reyndar ekki um nokkurn skóla sem notar það að ráði) og persónulega hefði mér þótt eðlilegt að velja kerfi sem almennileg reynsla er komin á hérlendis. Það má þó vel vera að einhver skóli hafi góða reynslu af kerfinu hérlendis og væri gott að vita af því.

• Hvaða kerfi voru skoðuð í úttekt upplýsingatæknideildar menntasviðs og hvaða forsendur voru til staðar? Voru opnar lausnir með í þessari úttekt? Hér á ég sérstaklega við um Moodle námsstjórnunarkerfið sem upplýsingatæknideild hefði getað sótt og sett upp án þess að greiða fyrir kerfið eða greiða leyfisgjöld vegna notkun þess.
• Hverjir stóðu fyrir þessari úttekt og hvaða kennslufræðilegu þættir voru metnir? Voru innlendir sérfræðingar á þessu sviði fengnir til ráðgjafar og þá hverjir?
• Blackboard er án efa dýrkeypt kerfi, hugsanlega eitt það dýrasta á markaðnum. Hvað mun þessi samningur Borgarinnar kosta þegar allt er saman talið, þ.e. kaup á kerfinu, innleiðing, kennsla og þjónusta. Voru þessir þættir hafðir í huga þegar kerfið var valið?
• Verður Blackboard þýtt yfir á íslensku og staðfært að íslensku menntakerfi? Og ef svo er hver ber þá kostnaðinn af því? Hver er kostnaðurinn við þýðingu/staðfærslu? Hér er sjálfsagt að taka það fram að í það minnsta 3 námsstjórnunarkerfi eru til í íslenskri þýðingu.
• Hvernig verður staðið að kennslu og þjálfun? Hvað mun sá þáttur kosta? Er til íslenskt kennsluefni eða kennarar sem þekkja notkun kerfisins eins og þær lausnir sem þegar eru í notkun hérlendis?
• Blackboard keypti nýverið helsta keppinaut sinn WebCT og hefur uppi áform um að sameina lausnirnar. Hefur menntasvið Reykjavíkurborgar tryggingu fyrir því að kerfið muni lifa áfram í þeirri mynd sem það er í dag og úttektin gerir væntanlega ráð fyrir?
• Var haft í huga aðgengi fatlaðra nemenda eða nemenda með sértæka námsörðugleika að kerfinu? Hlýðir Blackboard alþjólegum stöðlum hvað aðgengi varðar? Samkvæmt fréttatilkynningunni verður kerfið fyrst og fremst nýtt sem símenntunarbúnaður fyrir kennara og vettvangur nýrra kennsluúrræða fyrir bráðgera nemendur, valgreinakennslu og samnýtingu á kennsluefni. Hvað ætlar menntasvið að gera á vettvangi upplýsingatækninnar til að koma til móts við fatlaða nemendur og nemendur með sértæka námsörðugleika?

Ég hef sent þessar vangaveltur mínar til forstöðumanns upplýsingatæknideildar, Sigþórs Arnars Guðmundssonar og mun birta svör hans við þeim um leið og þau berast mér.