Hvers vegna valdi Reykjavíkurborg Blackboard? Svör hafa borist.
Sigþór hefur sent mér eftirfarandi svarpóst vegna fyrirspurnar minnar um innleiðingu Blackboard námsstjórnunarkerfisins hjá Reykjavíkurborg og kann ég honum góðar þakkir fyrir það. Ég á eftir að skoða bréf Sigþórs almennilega og mun bíða með viðbrögð þangað til ég hef haft góðan tíma til þess.
Takk fyrir þann áhuga sem þú sýnir framtaki okkar á sviði netnáms. Hér eru stutt svör við þeim spurningum sem þú varpar fram.
1) Voru opin kerfi skoðuð?
Nei, þar sem upplýsingatæknideild okkar er fámenn þá höfum við ekki mannafla til þess að koma einir að grunnuppsetningu á jafn stóru kerfi einir okkar liðs. Við reiðum okkur á stuðning sérfræðinga sem eru sérhæfðir í slíkum uppsetningum. Við skoðuðum sérstaklega stöðluð verkplön seljanda áður en kerfið var valið. Í þessu ferli verður BlackBoard samtengt við Mentor kerfið gagnvart nemendaskráningu í bekki og hópa og flæði einkunna til Mentors. Einnig verður BlackBoard tengt við önnur innri upplýsingakerfi sem eru í notkun innan Menntasviðs. Alger krafa var að til væri stöðluð eining til samtengingar við önnur upplýsingakerfi og aðgengi að ráðgjöfum framleiðanda við tenginguna.
Ein af þeim forsendum sem við göngum útfrá í vali okkar á kerfi að við getum gert þjónustusamning við framleiðanda kerfisins um neyðaraðstoð vegna alvarlegra rekstrarfrávika og að þeir beri ábyrgð á grunnuppsetningu kerfisins.
2) Kerfin sem komust áfram í endanlega skoðun voru Learning Manager, Angel, WebCD og BlackBoard.
3) Starfsfólk frá Menntasviði sem eru sérfræðingar á sviði kennslufræði, mannauðsráðgjafar og tölvunarfræðingar komu að úttekt kerfana. Innan Menntasviðs starfa 4300 mjög hæfir starfsmenn á sviði menntamála sem unnt var að velja úr. Úttektin fór þannig fram að gerður var þarfalisti um getu komandi kerfis. Síðan var borið saman geta kerfa til að uppfylla þarfalistann.
4) Kostnaður við innkaup á BlackBoard kerfinu var lagður fram gagnvart Innkauparáði Reykjavíkurborgar ásamt greinargerð um forsendur vals.
Þar kemur fram að BlackBoard kemur betur út verðlega séð en WebCD. Kaup á kerfinu, innleiðing, kennsla (Tölvutakarverkefnið) og þjónusta var metin og gerðar áætlanir um alla þá þætti. Sumir þessara þátta hafa verið í undirbúningi og vinnslu í þrjú ár og eru samvinnuverkefni innan Evrópusambandsins.
5) BlackBoard verður þýtt á íslensku og það verður staðfært að hverjum einstökum skóla sem settur verður upp í kerfinu ásamt staðfærslu að miðlægari kennslueiningum s.s. Tölvutökum, Tungumálaveri o.s.frv. Styrkur BlackBoard í þýðingu tungumála er að BlackBoard fylgir sérstakt þýðingarforrit þar sem notað er grafískt notendaumhverfi til að þýða kerfið. BlackBoard var eina kerfið sem skoðað var sem studdi mismunandi tungumál á sama tíma eftir skólum, námskeiðum og nemendum. Núverandi stuðningur eru 11 tungumál á sama tíma. Norrænu nágrannaþjóðirnar eru flestar ef ekki allar að vinna að þýðingu á kerfinu fyrir sitt tungumál. Menntasvið mun þýða kerfið gegnum þýðaraeininguna.
6) Næsta haust verður gangsett verkefnið Tölvutök. Það er símenntunarverkefni sem miðar að því að kenna notkun upplýsingatækni í almennu skólastarfi. Gert er ráð fyrir að allir grunnskólakennarar í Reykjavík verði búnir að fara í gegnum Tölvutök á næstu 3-4 árum. Hver kennari sem gengur gegnum Tölvutök mun á einum kennsluvetri ganga í gegnum staðlar námseiningar sem allar verða kenndar í BlackBoard og nýta um leið BlackBoard til kennslu í sínum bekkjum.
7) Úttektin sem gerð var miðast við nýjustu útgáfu BlackBoard. Farið var á vinnufund hjá BlackBoard í Evrópu þar sem farið var yfir innleiðingarferli, framtíðarsýn BlackBoard, kerfið var skoðað nákvæmt með sérfræðinga BlackBoard til útskýringar á þeim spurningum sem við höfðum og vöknuðu við þessa lokayfirferð á kerfinu. Ekkert í framtíðarsýn og áætlunum BlackBoard til 2 ára gaf til kynna að notkunargildi kerfisins yrði skert á komandi árum. Einnig kom fram að BlackBoard verður ráðandi kerfið og fluttir verða yfir í það kerfi þeir einstöku kerfisþættir sem WebCD hefur útfært á betri máta en BlackBoard.
BlackBoard kerfið verður jafnt notað sem sem netnámsstuðningur í almennri kennslustofu sem og netnám í fjarkennslu. Engar skorður eru settar hvorki í framtíðarsýn okkar á notkun kerfisins né innan kerfisins sjálf á því hvaða leiðir verða notaðar í beitingu kerfisins í kennslu. BlackBoard uppfyllir samt ekki W3C WCAG. Í þeim úttektum sem við skoðuðum kom samt fram að ekkert í kerfinu hindrar gerð slíkrar uppsetninga – en BlackBoard hefur ekki innri stuðning við slíka uppsetningu og fellur því á staðlaprófinu.
Að lokum er rétt að svara ábendingu þinni um að BlackBoard er ekki í notkun á Íslandi núna í dag. Það er réttmæt ábending og er eðlilegt að gefa skýringar á afhverju BlackBoard var valið en ekki WebCD. Meginástæða þess er vegna sameiningar á þessum kerfum þar sem BlackBoard verður ráðandi kerfið. Það mun gerast á næstu tveimur árum. Það er augljóst óhagræði af því að taka í notkun kerfi sem á að hverfa inn í annað kerfi á næstu tveimur árum. Þá stöndum við frammi fyrir því að tvíendurmennta nemendur og kennara í notkun á þessum tveimur kerfum. WebCd er hinsvegar notað á mörgum stöðum (þar með talið í Kennaraháskólanum) og munu þeir aðilar færast í átt til BlackBoard virkni eftir því sem árin tvö líða.
mbk,
Sigþór
February 15th, 2006 at 10:22
Til Sigþórs;
Já, WebCD, er það eitthvað nýtt kerfi semsagt?
Ég leyfi mér að áætla að þrátt fyrir ítrekaða notkun á hugtakinu “WebCD”, þá sé hér frekar átt við þekkta kennslukerfið WebCT.
Hvað stendur í vegi fyrir Reykjavíkurborg að gera samning við Moodle Inc? Eða eitthvert af þeim fyrirtækjum sem eru skráðir Moodle Partners og þjónusta Moodle um allan heim — ég veit ekki til þess að Blackboard sé íslensk smíði, svo það getur varla verið tiltökumál að gera frekar samning við eitt fyrirtæki á alþjóðamarkaði frekar en annað?
Var þetta það eina sem stóð í vegi fyrir athugun Moodle kerfisins? Sá misskilningur að ekki væri hægt að gera þjónustusamning við fyrirtæki sem gæti brugðist við vandamálum sem komið gætu upp?
Svör við næstu punktum eru flestöll ótengd athugasemdum þeim sem ég myndi gera, eins og t.d. hvort að innkauparáð Reykjavíkur samþykkti kaupin á Blackboard frekar en WebCT, nefndin samþykkir líklega bara ódýrasta og besta kost sem henni er kynntur — en Moodle (og önnur frjáls kerfi, s.s. Sakai og Plone) var ekki haft með í reikningnum.
Varðandi þýðingu á BlackBoard, þá reikna ég með að einhver þurfi að borga fyrir þá þýðingu, og þar sem a.m.k. þrjú önnur kerfi eru nú þegar til á Íslensku þá verður kostnaður við þýðingu á BlackBoard að teljast stór galli við innleiðingu kerfisins. Þrátt fyrir að “grafísk tól” séu til, þá eru þýðingar ekki ókeypis, og þar að auki eru til grafísk tól til að þýða flest ef ekki öll frjálsu kennslukerfin.
Varðandi þjálfun, jú vissulega verður þjálfun, takk fyrir að láta okkur vita af því, en hver verður kostnaðurinn við það? Þessi þjálfun og kostnaður við hana (ásamt þeim kostnaði sem ég hef spurt um hér að undan) mun hjálpa til við að mynda skiptiþröskuld, þ.e. ef á daginn kemur að annað kerfi myndi henta betur, þá munu menn vera tregir til að afskrifa þessar fjárfestingar, og kennarar munu vera tregir til að vilja læra á nýtt kerfi.
Næsti punktur á við um sameiningu WebCT og BlackBoard, og miðað við það sem liggur þar fyrir er BlackBoard betri kostur en WebCT, gott að þið rannsökuðuð það.
Ég vona svo sannarlega að komið verði til móts við fatlaða nemendur og nemenda með sértæka námsörðugleika, og að kerfið leyfi breytingar á þeim grundvelli sem þarf — þar sem kerfið er lokað finnst mér ekki tryggt að slíkt sé hægt vandræðalaust.
Varðandi síðasta punktinn, þá heldurðu ennþá áfram að réttlæta hví BlackBoard var valið en ekki WebCT. Það er greinilega stór misskilningur í gangi hér, þar sem að WebCT er á leiðinni út, þetta vita allir sem koma nálægt þessum geira, og athugasemdir fólks hafa ekki beinst að því, heldur afhverju opnar, frjálsar lausnir sem hægt er að aðlaga ótakmarkað að íslenskum aðstæðum, stöðlum, osfrv, og nota ótakmarkað án leyfisgjalda virðast ekki hafa verið skoðaðar í þessu samhengi?
Í þessu svari þínu þá kemur ekki fram nein skýring á því afhverju Moodle (eða önnur opin, frjáls kerfi) hafi ekki verið í mengi þeirra kerfa sem skoðuð voru. Einnig kemur ekkert fram um kostnað, nema það að innkauparáð hafi samþykkt kaupin — en magnað! Þess utan kemur ekkert fram hverskonar stuðning þið ætlist til að fá frá framleiðendum hugbúnaðarins, né hvað það mun kosta.
Í stuttu máli sagt eyðirðu miklum tíma í að útskýra að Blackboard sé betra en WebCT. Takk, þetta var sannfærandi.
Ég sendi Stefáni Jóni tölvupóst fyrir viku síðan sem ég hef ekki fengið svar við, en læt fylgja hér að neðan, því í póstinum spyr ég spurninga sem ég væri enn til í að fá svör við;
Komdu sæll Stefán,
Það væri mjög áhugavert að heyra skoðun þína á máli sem hann Sigurður Fjalar talar um á vef sínum hér;
http://sfjalar.net/?p=82
Sérstaklega væri áhugavert að heyra hvað þótti mæla gegn Moodle kerfinu sem hann minnist á, en það er frjáls og opinn hugbúnaður sem allir mega nota í hvaða tilgangi sem er að kostnaðarlausu.
Í haust tilkynnti Open University að þar skildi Moodle kerfið tekið upp; http://www3.open.ac.uk/events/7/2005118_40887_nr.doc
Einnig væri áhugavert að vita hverskonar stuðning við staðla er hægt að tryggja með notkun Blackboard, sem er lokað kerfi þar sem allri þróun er stýrt af einu fyrirtæki, ólíkt Moodle og öðrum frjálsum, opnum kerfum þar sem hver sem er má bæta við hvaða þeim stuðningi sem þarfnast er.
Varðandi staðlana, þá sagði mér hún Sigrún Gunnarsdóttir hjá staðlaverkefni Menntamálaráðuneytisins, að ekki hefði verið leitað ráðlegginga hjá þeim varðandi staðla.
Ef þú hefur einhverntímann áhuga á að ræða um tækni eða hugbúnað, sérstaklega í menntageiranum, eða læra meira um opinn/frjálsan hugbúnað, kosti hans og galla (sem eru engir fyrir stofnanir eða notendur hugbúnaðarins), þá væri það mín ánægja að ræða við þig um þessi mál.
kv.
Steinn E. Sigurðarson