Njósnahugbúnaði hefur vaxið ásmegin á undanförnum árum og er nú svo komið að varla er óhætt á Netinu án sérstakrar aðgátar eða sérhæfðra varna í formi hugbúnaðar. Í því skyni að treysta öryggi netverja hefur Microsoft kynnt til sögunnar Windows Defender, verkfæri sem vinnur á njósnahugbúnaði og sækja má án endurgjalds á vef fyrirtækisins. Defender er í raun endurbætt útgáfa MS AntiSpyware forritsins sem einnig hefur staðið Windows notendur til boða án endurgjalds. MS AntiSpyware hefur reynst vera hið ágætasta forrit og er því óhætt að mæla með Windows Defender. Ég hvet því Windows notendur til að sækja það hið fyrsta og setja upp á tölvur sínar.

Windows Defender er enn í beta útgáfu (beta 2 reyndar) sem merkir að ekki er um endanlega útgáfu að ræða heldur útgáfu sem er á lokastigi og enn í prófunum. Meðal nýjunga í útgáfunni er eftirfarandi:

• Nýtt og einfaldara notendaviðmót
• Tenging við Outlook
• Sjálfvirkar uppfærslur

Þess má geta að á vef Microsoft má einnig sækja forrit sem nefnist “Malicious Software Removal Tool”, en það getur fjarlægt yfir 50 skaðræðisforrit sem lauma sér óumbeðin inn í tölvur Netverja öllum til ama.

Ad-Aware er annað vel þekkt verkfæri sem veitir vörn gegn njósnahugbúnaði og getur, líkt og Windows Defender, einnig hreinsað til í tölvunni eftir að slíkar óværur hafa náð þar fótfestu. Ekkert er því til fyrirstöðu að setja upp bæði Windows Defender og Ad-Aware á sömu tölvunni. Þekkt er að varnarbúnaður sem þessi notar ólíkar aðferðir við að greina njósnahugbúnað og því næst betri árangur með “samvinnu”. Ad-Aware (personal útgáfuna) er hægt að sækja án endurgjalds.

Á Vísindavefnum má finna frekari upplýsingar um vírusa, trójuhesta, orma og njósnahugbúnað og hér er svo vísun í áhugaverða grein um sama viðfangsefni á Deiglunni.