sfjalar

Lectopia er áhugaverð lausn sem þróuð hefur verið við Háskólann í vestur Ástralíu og tæplega 30% háskóla í Ástralíu nota til þess þess að taka upp og dreifa fyrirlestrum á Netinu. Michael Fardon, einn upphafsmanna verkefnisins, flutti mjög góðan fyrirlestur um Lectopia á Educause 2005 ráðstefnunni síðasta vetur, sem hann nefndi “Distributed Learning Utilizing On-Demand Internet-Transmitted Lectures: A Case Study”. Fyrirlesturinn er aðgengilegur á mp3 sniði auk þess sem hægt er að sækja glærurnar sem honum fylgja á Powerpoint sniði.

Í fyrirlestrinum gerir Fardon ágæta grein fyrir umfangsmikilli hagnýtingu Lectopia (upphaflega nefnt iLecture) við Háskólann í vestur Ástralíu þar sem um 360 fyrirlestrar eru teknir upp og gerðir aðgengilegir á Netinu í hverri viku. Hann fjallar um kosti kerfisins, s.s. mikla sjálfvirkni og einfaldleika í notkun, og einnig helstu ástæður nemenda fyrir notkun þess. Þá minnist hann í fyrirlestrinum á þætti eins og kostnað og kennslufræðilegar áherslur.

Hér að neðan hef ég tekið saman nokkra skemmtilega punkta sem Fardon talar um í fyrirlestri sínum og birtir eru í meðfylgjandi glærum:

• Lausnin var m.a. þróuð vegna aukinna krafa kennara og nemenda um aðgengi að efni
• Nemendur geta einnig notað lausnina við upptöku á eigin efni, s.s. við verkefnavinnu
• Mikil sjálfvirkni einfaldar notkunina
• Nemendur geta sótt fyrirlestra á mp3 spilarana sína (Podcasting)
• Lítill rekstrarkostnaður og stofnkostnaður í lágmarki miðað við umfang (um 250.000$)
• Samþætting við námsstjórnunarkerfi, s.s. Blackboard og WebCT
• Gríðarleg aukning í notkun
• Hljóðupptökur eru alls 57% upptakanna, þ.e. 199 upptökur á viku
• Einungis 2% eru videóupptökur
• Mikil aukning á notkun nemenda þegar fer að líða að prófum
• 60% nemenda nota kerfið til að fara yfir námsefnið
• 43% nemenda nota kerfið til að kynna sér betur einstaka efni eða efnisþætti
• 38% nemenda nota kerfið vegna árekstra í töflu
• 30% nemenda nota kerfið til að samræma vinnu og nám
• 25% nemenda kjósa fyrirlestra á Netinu umfram hefðbundna (f2f) fyrirlestra
• Netbundnir fyrirlestrar eru vinsælastir meðal 16 - 20 ára og 26 - 30 ára nemenda
• Netbundnir fyrirlestrar eru vinsælir hjá nemendum sem búa langt frá skólanum
• Netbundnir fyrirlestrar eru vinsælir meðal stúlkna
• Netbundnir fyrirlestrar eru vinsælir hjá hinum meðalnemanda
• Netbundnir fyrirlestrar eru óvinsælastir hjá “getumestu” nemendunum
• Netbundnir fyrirlestrar eru óvinsælastir hjá “getuminnstu” nemendunum, þ.e. nemendum sem falla
• Netbundnir fyrirlestrar eru óvinsælastir hjá nemendum sem eru 30 ára og eldri
• Tímastókn hefur einungis minnkað um 5% - 10% eftir að lausnin var tekin í notkun
• Nemendur spyrja síður endurtekinna spurninga um innihald efnissins eftir að kerfið var tekið í notkun
• Kennarar telja að aðgengi að eigin fyrirlestrum auki möguleika þeirra á sjálfsmati
• Kennarar telja að aðgengi að fyrirlestrum frá fyrra ári einfaldi skipulagningu á áföngum

Ég hvet alla þá sem hafa áhuga á því að kynna sér möguleika hugbúnaðarlausna eins og Lectopia við upptöku og miðlun fyrirlestra að kynna sér þróunarstarfið innan Háskólans í vestur Ástralíu.

Hér má finna frekari upplýsingar um Lectopia.

Technorati Tags: Lectopia, Educause, Michael Fardon