Í kjölfar síaukinna vinsælda stafrænna myndavéla hefur þeim fjölgað mjög sem kjósa að geyma fjölskyldumyndirnar á tölvum sínum í stað hefðbundinna myndaalbúma.

Gæði stafrænna mynda hafa einnig aukist til muna og notkun á myndavélunum orðin einfaldari. Helst gallinn er sá að nú er svo auðvelt og ódýrt að taka myndir að áður en nokkur gerir sér grein fyrir því er tölvan orðin yfirfull af myndum, óflokkuðum og því óaðgengilegum. Þetta kannast væntanlega margir við. Vandamálið er svo ennþá stærra innan fyrirtækja eða stofnana þar sem mikið er unnið með stafrænar myndir. Ágætt dæmi um það eru skólastofnanir þar sem stafrænar myndavélar eru orðnar mikilvægt verkfæri.

Hér kemur Picasa hugbúnaðurinn til sögunnar en hann hefur nýlega verið þýddur yfir á íslensku og aukinn nokkuð. Í stuttu máli sagt er Picasa forrit sem gerir notendum kleift að halda utan um myndasafnið í tölvunni á einfaldan og mjög handhægan máta. Hversu stórt og óviðráðanlegt sem það kann að hafa verið.

Picasa inniheldur einnig allar helstu aðgerðir til að breyta og/eða lagfæra myndir. Einfalt er að flokka myndir í sérstök albúm, merkja þær og skrá inn lýsingar á myndefninu. Síðast en ekki síst býr Picasa yfir öflugum verkfærum til að færa myndir yfir á geisladiska, senda í tölvupósti eða prenta þær á pappír.

Picasa er hægt að sækja á vefnum án endurgjalds á slóðinni www.Picasa.com.