Þann 18. apríl s.l. uppfærði Google gagnagrunnin á bak við Google Earth og Google Maps þjónustuna með nýjum gervitunglamyndum. Uppfærslan hefur í för með sér að mörg landsvæði eru nú sýnileg í betri upplausn en áður, staðarheitum hefur fjölgað og landamæri eru greinilegri. Stór hluti vestur evrópu er þannig orðinn mun skýrari en áður og t.a.m. er vel þess virði að skoða heimsborgir eins og París , Amsterdam eða Haag.

Hvað Ísland varðar þá eru breytingarnar helst þær að stór-reykjavíkursvæðið og umhverfið þar í kring sést nú í mun betri myndgæðum en áður. Svo nákvæmar eru myndirnar að auðvelt er að greina hvort bílar séu í bílastæðum við hús. Það er líka mjög skemmtilegt að sjá munin á myndum sem eru teknar að sumri til eða vetri. Auðvitað er óskandi að fá allt landið í svipuðum gæðum, en líklegast verður bið á því. Hér að neðan má sjá nokkrar myndir úr Google Earth af Reykjavík og nágrenni, en á þeim sést vel hversu mikil gæðin eru orðin.

Þessi uppfærsla boðar margvíslega möguleika hvað varðar þau not sem hafa má af Google Earth í skólastarfi. Ég sé t.a.m. fyrir mér mörg spennandi verkefni sem skólar í Reykjavík og nágrenni geta unnið með aðstoð þess, nú þegar þetta landsvæði er orðið það greinilegt að hægt er að þekkja landsvæði, götur og hús.