Á vefnum namsskipan.is birtir menntamálaráðuneytið drög að nýjum námskrám fyrir grunn- og framhaldsskóla vegna breyttrar námskipunar til stúdentsprófs. Drögin eru lögð fram til kynningar hagsmunaaðilum og almenningi eins og þar segir og er kostur gefinn á að gera skriflegar athugasemdir við námskrárnar og koma á framfæri við ráðuneytið í löturpósti eða senda á netfangið namskra@mrn.stjr.is. Að loknu umsagnarferlinu mun ráðuneytið gera þær lagfæringar á námskránum sem nauðsynlegar kunna að teljast.

Samkvæmt frétt á vefnum sem birt var 2. mars sl. var veittur frestur til 1. apríl að skila inn athugasemdum og ábendingum varðandi drög að namskrám sem birt voru á vefnum 1. febrúar sl. Á þeim tíma mátti finna drög að nánast öllum endurskoðuðum námskrám grunn- og framhaldsskóla á vefnum, þ.e. að námskrám í upplýsingatækni undanskyldum. Í dag er 3. júní og enn bólar ekkert á drögum að námskrám í upplýsingatækni! Hvað veldur?

Ég hef mikinn áhuga á því að sjá þessi námskrárdrög og kynna mér áherslur og markmiðssetningar menntamálaráðuneytisins í upplýsingatækni á grunn- og framhaldsskólastigi. Og ég á mjög erfitt með að sætta mig við áhugaleysi stefnumótandi aðila á því að gera þessi drög aðgengileg á sama eða í það minnsta svipuðum tíma og önnur námskrárdrög.