Ég sótti Tuxpaint teikniforritið fyrir stuttu svona til að kynna mér. Ég hef vitað af þessu forriti í lengri tíma en aldrei komið mér að því að prufa það. Niðurstaðan er sú að um stórsniðugan hugbúnað er að ræða sem óhætt er að mæla með fyrir leikskóla og nemendur í yngri bekkjum grunnskólans. Það spillir ekki fyrir að Tuxpaint hefur verið íslenskað.

Tuxpaint hefur fengið einróma lof notenda enda einfaldleikinn í fyrirrúmi. Hér fyrir neðan má sjá notendaviðmót forritsins. Vinnusvæðið er í miðjunni, vinstra megin má finna teikniverkfærin og hægra megin birtast svo frekari stillingar eða valkostir tengdir hverju einstaka verkfæri (þegar við á). Skemmtileg hljóð fylgja verkfærunum þegar þau eru notuð (hægt að hækka/lækka innan forritsins)

Tuxpaint er til á fjölda tungumála og þar á meðal íslensku. Ekki þarf að sækja íslensku þýðinguna sérstaklega. Íslenska þýðingin er unnin af Pjetri G. Hjaltasyni. Hún er góð en ennþá eru nokkrir textastrengir óþýddir.

Tuxpaint má sækja án endurgjalds á vefnum www.tuxpaint.org, enda um opinn hugbúnað að ræða. Tuxpaint er fáanlegt fyrir Linux, Mackintosh og Windows stýrikerfi (og fleiri reyndar).