Picasa er vinsæll hugbúnaður, enda ókeypis verkfæri (í boði Google) til þess að skipuleggja og halda markvisst utan um stafræn myndasöfn í tölvum Windows eða Linux notenda. Picasa inniheldur auk þess fjölmörg verkfæri til einfaldrar myndvinnslu og lagfæringa á ljósmyndum.
Sjálfur nota ég Picasa til þess að halda utan um stafræna myndasafnið í tölvunni minni en hýsi myndir á Flickr, þær sem ég vil gera aðgengilegar umheiminum. Nýlega rakst ég á leiðbeiningar um hvernig tagga má myndir innan Picasa og senda síðan með þeim upplýsingum yfir í Flickr. Aðferðin reyndist alveg ágætlega þannig að ég tók saman leiðbeiningar um ferlið á íslensku. Þessar leiðbeiningar geri ég nú aðgengilegar netverjum.
