Macaulay Library er heimsins stærsta safn dýrahljóða og hefur m.a. að geyma yfir 160.000 upptökur af fuglahljóðum. Það munu vera hljóð frá u.þ.b. 67% allra fuglategunda í heiminum í dag. Safnið hefur einnig að geyma upptökur af hljóðum skordýra, fiska, froska og spendýra.

Macaulay safnið hefur nú gert stóran hluta safnkostsins aðgengilegan á Netinu, eða yfir 65.000 hljóðupptökur og 18.000 myndskeið.

Til þess að hlusta á upptökurnar þarf Realplayer spilarinn að vera uppsettur og er það miður að ekki skuli vera notast við algengara skráarsnið. Fjölmörg dýrahljóð eru einnig aðgengileg á myndrænu sniði og þarf að sækja sérstakan spilara, RavenViewer til að spila þær skrár. RavenViewer byggir á Quicktime og er sóttur án endurgjalds á vef Macaulay safnsins.

Því miður virðist notendum ekki boðið upp á þann kost að vista hljóðskrár yfir á eigin tölvu, en hægt er að kaupa einstaka hljóð eða geisladiska með hljóðskrám.