Þann 5. janúar sl. var Julie Amero, 40 ára forfallakennari við Kelly Middle School í Bandaríkjunum, fundin sek um að valda 11 og 12 ára nemendum sínum andlegum og tilfinningalegum skaða með því að birta með ráði eða sökum kæruleysis klámfengið myndefni í kennslustund. Amero bíður allt að 40 ára fangelsisdómur. Sjálf segist hún saklaust fórnarlamb aðstæðna og hefur neitað dómsátt sem hefði tryggt henni frelsi gegn ákveðnum skilyrðum.

Dómsmálið má rekja til atburðar sem átti sér stað árið 2004, nánar tiltekið þann 19. október, þegar Amero var fengin til að aðstoða við kennslu í 7. bekk skólans. Eins og gefur að skilja ber málsaðilum ekki saman um hvað nákvæmlega gerðist inna veggja skólastofunnar þennan örlagaríka dag. Samkvæmt skólayfirvöldum er Amero sek um grófa og vítaverða misnotkun á tölvum skólans. Framburður Julie Amero er allt annar.

Frásögn Julie Amero
Julie Amero segist hafa komið inn í kennslustofuna rétt áður en kennsla hefst í fylgd annars kennara sem skráir hana inn í kennaratölvuna. Skömmu síðar þarf hún að bregða sér frá og þegar hún kemur aftur er sá kennari horfinn og tveir nemendur að vafra um Netið í tölvunni.
Amero rekur nemendurna tvo úr tölvunni og hleypir bekknum sem hún á að kenna inn í kennslustofuna. Skömmu eftir að kennsla er hafin tekur Amero eftir því að klámfengið myndefni fer að birtast í sprettigluggum (popups) á skjá tölvunnar. Til að forða nemendum frá því að sjá myndirnar snýr hún skjánum frá þeim og á meðan nemendur eru að vinna reynir hún árangurslaust að loka fyrir óæskilegt myndefnið. En án árangurs því í hvert sinn sem hún lokar einum glugga, opnast annar. Amero veit ekki hvað hún á til bragðs að taka og biður táknmálstúls sem þá var til aðstoðar í kennslutofunni að fylgjast með nemendum á meðan hún sæki hjálp. Táknmálstúlkurinn verður ekki við þeirri ósk hennar. Amero getur því ekki yfirgefið kennslustofuna fyrr en í hádegishlénu og fer þá á kennarastofuna og biður um aðstoð. Þar sem hún hefur ekki lykil að kennslustofunni læst hún ekki á eftir sér. Á kennarastofunni er heldur enga hjálp að hafa en þar er henni tjáð að sprettigluggar séu algent vandamál sem óþarfi er að hafa miklar áhyggjur af. Amero fær því enga aðstoð þrátt fyrir að hafa leitað eftir henni. Við lok dagsins segir hún aðstoðarskólastjóranum frá því sem gerðist og sjálfum skólastjóranum daginn eftir.

(Þessi frásögn er fengin úr skýrslu Nancy Willard, sérfræðings á sviði tölvuöryggis)

Málatilbúnaður yfirvalda og skólastjórnenda
Skólastjórnendur og yfirvöld kenna Amero alfarið um hvernig fór og segja hana bera fulla ábyrgð á gjörðum sínum. Sérfræðivitni málsækjanda, Mark nokkur Lounsbury, heldur því fram að Amero hljóti að hafa smellt viljandi á krækjur að klámfengnu efni með það í huga sækja það og skoða. Svona hlutir gerist aldrei að sjálfu sér.

Yfirvöld benda einnig á þá staðreynd, að nokkrum dögum áður en atburðurinn átti sér stað hafi Amero fengið tiltal frá skólastjórnendum vegna þess að hún sýndi nemendum ekki nógu mikla athygli að þeirra mati og eyddi of miklum tíma í tölvunni í kennslustundum.

Yfirvöld, skólastjórnendur og reyndar fleiri aðilar sem fjallað hafa um málið benda enn fremur á þá staðreynd að Amero slökkti aldrei á tölvunni. Í raun virðist þetta að mörgu leyti höfuðatriði málsins. Niðurstaða dómsins grundvallast ekki á því hvernig efnið vafasama rataði í kennaratölvuna heldur á því, að Amero hafi ekki gert allt sem í hennar valdi stóð til að forða nemendum hennar frá því sjá það. Hvers vegna slökkti hún ekki einfaldlega á tölvunni?

Réttarhöldin og eftirmálar þeirra
Við réttarhöldin yfir Amero lýstu 6 nemendur bekkjarins því yfir að hafa séð klámfengnar myndir á tölvuskjá hennar, annað hvort þaðan sem þeir sátu eða þegar þeir komu upp að kennaraborðinu. Einn nemandinn segir Amero hafa ýtt sér frá í því skyni að koma í veg fyrir að hann sæi myndirnar á skjánum. Aðspurð um ástæðu þess að hún slökkti ekki á skjánum sagðist Amero hafa fengið skýr fyrirmæli um að slökkva ekki á tölvunni. Fram kom við réttarhöldin að Amero gerði tilraun til þess að sækja aðstoð á kennarastofuna, eins og hún tilgreinir í frásögn sinni, en þó virðist hún ekki hafa upplýst neinn nákvæmlega um eðli vandræðanna.

Réttarhöldin yfir Julie Amero hafa verið gagrýnd af bæði sérfræðingum og áhugafólki sem fylgst hefur með framgangi þeirra og eru flestir þeirrar skoðunar að þau hafi verið meingölluð.

Í fyrsta lagi þá yfirheyrði lögreglan ekki starfsfólk skólans og kennaratölvan umrædda var ekki rannsökuð með tilliti til njósnahugbúnaðar, trójuhesta, vírusa eða annars hugbúnaðar sem orsakað gæti eitthvað í líkingu við það sem Amero lýsti. Þá var heldur ekki gerð tilraun til þess að endurskapa aðstæður til að komast að því hvað raunverulega átti sér stað. Þegar David Smith, lögfræðingur málsækjanda, var spurður um ástæður þess sagði hann að verjendur Amero hafi aldrei velt upp þeim möguleika að kennaratölvan hafi verið sýkt af hugbúnaði sem gæti hafa verið orsakavaldur atburðarins. En er hugsanlegt að óæskilegur hugbúnaður hafi átt hér hlut að máli?

Í kjölfar málatilbúnaðar skólayfirvalda og stjórnvalda á hendur Julie Amero hafa fjölmargir aðilar bent á það sem nærtæka skýringu á vandræðum hennar að kennaratölvan hafi verið smituð af óæskilegum hugbúnaði. Það er ekkert leyndarmál að milljónir tölva um allan heim eru smitaðar af einhverskonar hugbúnaðaróværu. Það er heldur ekkert leyndarmál að njósnahugbúnaður, auglýsingaforrit, ormar og vírusar hverskyns geta laumast inn í tölvur notenda, hulið slóð sína og jafnvel tekið yfir vefkoðara og framkallað sprettiglugga með nánast hvaða innihaldi sem er. Ekki ósvipað og Amero lýsir í frásögn sinni. Þegar þessi kenning var skoðuð nánar kom ýmislegt áhugavert upp á yfirborðið.

Svo virðist sem skólayfirvöld hafi brugðist þeirri mikilvægu skyldu sinni að tryggja öryggi upplýsingakerfisins. Eldveggur tölvukerfis skólans var t.a.m. óvirkur þar sem leyfisgjöld höfðu ekki verið greidd. Efnissíur og sérhæfður hugbúnaður til að vernda kerfið gegn óværum eins og njósnahugbúnaði höfðu ekki verið uppfærðar. Engar öryggisreglur höfðu verið settar og kennarar höfðu ekki fengið nægjanlega þjálfun í notkun tölva. Það er því nokkuð augljóst að skólastjórnendur hafa ekki gert allt sem í þeirra valdi stendur til þess að koma í veg fyrir að svona atburður eins og átti sér stað þann 19. október 2004. Sumir hafa jafnvel gengið svo langt að halda því fram að yfirvöld kjósi frekar að koma sökinni á Amero og forðast þannig kostnaðarsöm málaferli vegna eigin afglapa.

Hér verður ekki skorið úr um réttmæti réttarhaldanna og dómsins yfir Julie Amero enda erfitt að fullyrða nokkuð í þeim efnum. Það er hinsvegar ljóst að nánast allir sem að málinu koma hafa brugðist á einn eða annan hátt. Julie Amero átti vissulega kost á því að slökkva á tölvunni þegar klámfengið efni tók að spretta upp eins og gorkúlur á skjánum. Skólayfirvöld áttu auðvitað að tryggja öryggi tölvukerfis skólans og það er ótrúlegt kæruleysi af þeirra hálfu að sjálfsögð öryggisráðstöfun eins og eldveggur skuli ekki hafa verið til staðar. Verjandi Julie átti að leita sér sérfræðiþekkingar og benda á þann möguleika að þarna gætu tölvuóværur verið að verki og lögreglan sem rannsakaði málið átti að sjálfsögðu að kanna tölvuna með tilliti til slíks hugbúnaðar. En það er svo auðvelt að vera vitur eftir á er það ekki?

Endanlegur dómur verður kveðinn upp í máli Julie Amaro þann 2. mars nk. og munu efalaust margir fylgjast með þeirri stefnu sem málið tekur þá.

Sagan af Julie Amero snertir okkur öll og kannski sérstaklega okkur sem nýtum upplýsingatæknina við kennslu. Það má draga af þessari sögu margvíslegan lærdóm og það er mikilvægt að það sé gert. Meira síðar.

Sagan af Julie Amero er unninn upp úr eftirfarandi heimildum:

http://www.norwichbulletin.com/apps/pbcs.dll/article?AID=/20070225/NEWS01/702250334
http://www.norwichbulletin.com/apps/pbcs.dll/article?AID=/20070106/NEWS01/701060312/1002/NEWS17
http://www.securityfocus.com/columnists/434/1
http://www.alternet.org/rights/46925/
http://www.wired.com/news/columns/0,72786-0.html?tw=rss.index
http://www.vitalsecurity.org/labels/Julie%20Amero.html
http://blog.state-v-amero.com/2007/02/22/nancy-willard-the-julie-amero-tragedy.aspx
http://en.wikipedia.org/wiki/Julie_Amero
http://www.downes.ca/cgi-bin/page.cgi?post=39083
http://www.drumsnwhistles.com/2007/02/22/nancy-willard-the-julie-amero-tragedy/
http://www.nytimes.com/2007/02/14/nyregion/14teacher.html?pagewanted=2&ei=5070&en=7c4d5157b3e07688&ex=1172466000
http://216.239.59.104/search?q=cache:OUTWbf8I-uwJ:bulletineducationblog.blogspot.com/ +http://bulletineducationblog.blogspot.com/&hl=en&ct=clnk&cd=1&gl=uk&client=firefox-a
http://www.cnn.com/2007/LAW/02/13/teacher.porn.ap/index.html