DailyLit er bráðsniðug þjónusta á Netinu sem ég uppgötvaði nýlega og er að prufukeyra um þessar mundir. Hugmyndin að DailyLit er mjög einföld. Notendur skrá sig fyrir aðgangi á vefnum og gerast áskrifendur að einni bók eða fleirum úr viðamiklu safni ritverka sem vefurinn hefur að geyma. Með reglulegu millibili fá notendur svo senda hluta úr bókunum í tölvupósti eða lesa með RSS lesara.

Í því skyni að prófa DayliLit gerðist ég áskrifandi að einni skemmtilegustu ævintýrasögu sem skrifuð hefur verið, nefnilega Gulleyjunni eftir skoska rithöfundinn Robert Louis Stevenson. Gulleyjan hefur lengi verið í uppáhaldi hjá mér og ég hef margoft lesið hana, en aldrei í tölvupósti.

DayliLit skiptir Gulleyjunni í 88 hluta og sendir mér þrjá hluta á viku, þ.e. á mánudögum, miðvikudögum og föstudögum. Ég hef einnig val um að fá sendingar daglega eða á virkum dögum einungis. Hver hluti er hæfilega langur þannig að það tekur ekki nema nokkrar mínútur að lesa hann. Ég hef einnig kost á því að fá næsta hluta sendan samstundis og auðvitað get ég hætt áskriftinni hvenær sem er.

Hver einstaka bók á DayliLit hefur eigin umræðuvef og geta áskrifendur rætt sín á milli um bókina hafi þeir áhuga á því. Ég ætla að láta reyna á þjónustu DailyLit dálítið lengur en ég er ekki frá því að þetta gæti reynst hentugt verkfæri t.d. í tungumálakennslu þar sem nemendur gerast áskrifendur að ákveðinni bók og ræða um hana annað hvor á umræðuvef DailyLit eða innan námsstjórnunarkerfis viðkomandi skóla.