Adobe ætlar sér greinilega að reyna að leika sama leik með Digital Editions og Apple hefur tekist svo vel með iTunes. Tilfinnanlegur skortur á vélbúnaði og ólíkir staðlar í útgáfu rafbóka gera það hins vegar að verkum að Adobe mun varla hafa erindi sem erfiði. Staðreyndin er því miður sú að þrátt fyrir nokkrar heiðarlegar tilraunir hefur engum ennþá tekist að skapa handhægan vélbúnað á aðlaðandi verði sem gegnir sama hlutverki fyrir ritað mál og myndir og iPod gerir fyrir hljóðrænt efni. Sjálfur er ég dálítið spenntur fyrir Sony Reader (sjá mynd) en líkt og svo margir aðrir þá er ég ekki tilbúinn til þess að reiða fram 300 dollara fyrir þá takmörkuðu virkni sem tækið býður uppá.
Ég vil geta skráð athugasemdir við texta og afritað hluta af honum til síðari nota. Ég vil tæki sem nýtist mér bæði við lestur og úrvinnslu efnis. Annar lesari sem ég hef verið að skoða er Hanlin eReader V8, en hann keyrir á Linux stýrikerfinu og býr yfir margfalt meiri kostum en Sony lesarinn en er á svipuðu verði. Aðrar áhugaverðar lausnir eru Cybook (væntanlegur) og STAReBOOK en ég hef lítið kannað þær.
Staðlar eru stórt vandamál á þessum vettvangi eins og svo mörgum öðrum. Þeir eru einfaldlega of margir og ólíkir og enginn einn er ráðandi. Sony lesarinn notast t.a.m. eigin staðal (BBeB) sem er lokaður og eign Sony fyrirtækisins, en getur þar að auki lesið xhtml og pdf skrár, jpg myndir og spilað hljóðskrár. Staðlar eru mikilvægir því það er með öllu óþolandi að fjárfesta í vélbúnaði sem er hannaður utan um eitt skráarsnið.
Rafrænar bækur (ebooks) hafa lengi verið í umræðunni sem augljóst skref í þróun bókarinnar. Enn sem komið er haf þær þó ekki náð almennilegu flugi samanborið við þá sprengingu sem orðið hefur á sviði stafrænnar tónlistar. Það er heldur engin tilviljun að einn helsti dreifingaraðili rafrænna bóka, Audible, sýslar með hljóðbækur.
Þar með er ekki sagt að engir finnist útgefendur stafrænna bóka á Netinu. Síður en svo. Fjöldi fyrirtækja selur bækur á Netinu sem hægt er að lesa annað hvort í tölvunni eða þar til gerðum vélbúnaði. Loks má sækja sér ritverk án endurgjald í þúsundatali á Project Gutenberg vefnum. Það nýta sér hins vegar fæstir þann möguleika að kaupa eða sækja sér stafrænar bækur og lesa annað hvort í tölvunni eða með þar til gerðum vélbúnaði.
Ég vona svo sannarlega að einhverjum takist að markaðssetja frambærilegan lesara fyrir rafbækur á viðráðanlegu verði og helst með tengingu í hugbúnað sem þjónað gæti sama hlutverki og iTunes. Ég hef litlar áhyggjur af framtíð hefðbundinna bóka og ímyndið ykkur bara tækifærin hvað varðar kennsluefni.
