Wellcome myndasafnið aðgengilegt á Netinu
Þann 15. júní sl. opnaði Wellcome myndasafnið dyr sínar netverjum og geta nú allir sem áhuga hafa sótt þangað fjölbreytt úrval myndefnis sem snertir sögu mannkyns og líf- og læknisfræði.
Myndirnar eru aðgengilegar á netinu á jpg sniði samkvæmt leyfisskilmálum Creative Commons, nánar tiltekið Creative Commons Attribution, Non-commercial Licence 2.0, sem heimilar afritun dreifingu og birtingu efnis svo lengi sem heimildar er getið og notkunin er ekki í hagnaðarskyni.
Wellcome safnið er kærkomin uppspretta mynda fyrir bæði nemendur og kennara og þar má finna myndir af öllu milli himins og jarðar, s.s. teikningum af Florence Nightingale og Charles Darwin í gerfi apa. Leitarorðið “Iceland” skilaði meira að segja nokkrum niðurstöðum og þar á meðal myndinni af Geysi hér að ofan.
Athugið að á Wikivef Fjölbrautaskólans í Breiðholti er að finna ágætt yfirlit yfir myndasöfn sem henta vel bæði kennurum og nemendum.
