Einu sinni kenndi ég námskeið við Kennaraháskólann sáluga þar sem hluti af verkefnavinnu nemenda fólst í því að halda úti bloggvef. Ég man ekki lengur hversu stór nemendahópurinn var en í því skyni að miðla skrifunum meðal nemenda sameinaði ég þær í einn stórann rss straum og varpaði inn í Moodle námsumhverfið sem ég að sjálfsögðu nýtti í kennslunni. Á þennan hátt gátum við öll sem að námskeiðinu komu fylgst með skrifum hvers annars okkur til gagns og gamans.

Mér hefur alltaf fundist það galli á gjöf Njarðar þegar hópur nemenda bloggar, að skrifin eru dreifð um vefinn og fá þar af leiðandi takmarkaðan athygli innan hópsins. Að sjálfsögðu þarf það ekki að vera meginmarkmið með skrifunum að koma þeim á framfæri við samnemendur en það hlítur að vera uppörvandi og hvetja nemendur áfram að vita að orð þeirra eru lesin. Markviss miðlun bloggfærslna einfaldar einnig jafningjamat sem er eftirsóknarverður kostur.

Hvað er RSS?

RSS (Really Simple Syndication) er XML staðall sem gegnir því  hlutverki að miðla yfirliti yfir nýjustu færslur á vefjum. Staðallinn geymir m.a. upplýsingar um titil efnis, lýsingu, slóð að efni, höfund, útgáfudagsetningu, flokk og fleira. Nánari lýsingu á staðlinum má finna hér. RSS skrár eru yfirleitt myndaðar sjálfvirkt af vinsælum vefumsjónarkerfum eins og t.a.m. Joomla og WordPress.

Til hvers RSS?

RSS er einfaldur staðall til að miðla gögnum og kemur að góðum notum t.d. við að varpa efni af einum vef yfir á annan. Færslum sem ég birti á sfjalar.net er t.a.m. varpað á vef 3F með aðstoð RSS. Þar eru einnig birt yfirlit yfir nýjustu færslur af Menntagátt og vef Skýrslutæknifélagsins. Menntagátt notar sömu tækni til að birta nýjustu fréttir af vef menntamálaráðuneytisins og svo mætti lengi telja.

RSS hentar einnig vel fyrir einstaklinga sem vilja fylgjast markvist með skrifum á hvers kyns vefjum, s.s. frétta- eða bloggvefjum. Til eru hagnýttir svokallaðir RSS lesarar. Mæli ég sérstaklega með Google Reader sem hefur reynst mér ákaflega vel. RSS lesarar virka þannig að notendur safna saman vísunum í RSS skrár í lesarann sem heldur utan um ólesið efni og birtir alltaf nýjustu færslurnar. Lestur í Google Reader fer þannig fram að notandinn skrunar yfir ólesnar færslur sem fyrir vikið verða merktar sem lesnar. Upplýsingar um áskriftir eru geymdar í svokölluðum opml (Outline Processor Markup Language) skrám sem hægt er að flytja á milli kerfa. Hér er opml skráin mín en hún inniheldur vísanir í alla vefi sem ég fylgist reglulega með og hana má flytja inn í RSS lesara að vild. Verði ykkur að góðu.

Vandaðir lesarar eins og Google Reader bjóða þar að auki upp á margvíslega aðra kosti s.s. að merkja færslur með lykilorðum, leita í færslusafninu, deila áhugaverðum færslum með öðrum notendum og stjörnumerkja færslur sem vekja sérstakan áhuga svo fátt eitt sé upptalið. Google Reader getur einnig búið til sérstaka RSS skrá sem inniheldur yfirlit yfir færslur sem merktar eru með ákveðnu lykilorði.

Ofangreindan eiginleika nota ég t.d. til þess að varpa öllum  greinum sem fjalla um vefsmíðar og ég tel áhugaverðar til nemenda minna í vefsmíðaáfanganum sem ég kenni við FB. Eins og sjá má á myndinni hér að ofan birti ég þar að auki upplýsingar um nýjar færslur á wikivef FB, en það er önnur saga. Í stuttu máli sagt þá eru möguleikarnir magnaðir.

Hvernig má sameina RSS?

Til þess að sameina RSS fréttalista hef ég nýtt þar til gerðar þjónustur á Netinu. Ég get bent á tvær sem eru bæði einfaldar í notkun og ókeypis. Mun fleiri eru til þarna úti og hef ég reynt fæstar þeirra, allar ábendingar eru vel þegnar.

• Feedkiller
• RSS Mixer

Ég hvet alla kennara sem vilja skoða nýjar leiðir til þess að nýta upplýsingatæknina í starfi sínu að kynna sér þessa kosti RSS tækninnar. Þeir eru vel þess virði að hagnýta.