Af ungu fólki og tækninotkun þess
Digital Youth Research nefnist samstarfsverkefni tveggja bandarískra háskóla sem undanfarin þrjú ár hafa rannsakað notkun ungs fólks á tækni og netmiðlum. Rannsóknarverkefnið er eitt umfangsmesta sinnar tegundar og niðurstöður þess eru nú aðgengilegar á Netinu.
Í því skyni að fá sem nákvæmasta mynd af tækninotkun ungs fólks tóku rannsakendur viðtöl við yfir 800 ungmenni og fylgust auk þess með notkun þeirra á tækninni í rúmlega 5000 klst. Niðurstöðurnar gefa til kynna að ungt fólk öðlist mikilvæga félags- og tækniþekkingu við iðju sína á Netinu á hátt er við sem eldri erum skiljum oft ekki né kunnum að meta.
Samfélagsvefir, skráardeilivefir, netleikir og smátæki eins og farsímar og smáspilarar (e. ipod) eru orðin órjúfanlegur hluti a menningarheimi ungs fólks sem notar tæknina í sífellt auknum mæli til að tjá sig á skapandi hátt, eiga samskipti við jafningja og móta sjálfsmynd sína.
Foreldrar hafa margir hverjir áhyggjur af þeirri tímasóun sem fylgir tölvuleikjum, netrápi eða samskiptum með tækni eins og smáskilaboðum (SMS). Rannsakendur vekja hins vegar athygli á því að í hugum ungs fólks þá eru þessi viðfangsefni áhugaverð og þau skipta raunverulegu máli. Hinn stafræni heimur hefur skapað ungu fólki ný og heillandi tækifæri til að tjá sig og takast á við lífið og tilveruna í gleði og sorg. Þetta ber ekki að vanmeta. Í myndskeiðinu sem fylgir hér að neðan fjallar Mizuko Ito, sem leiddi rannsóknina, um helstu niðurstöður.
Upplýsinga- og samskiptatækni nútímans hefur haft mikil áhrif á bæði samskipti og nám ungs fólks. Það þjónar litlum tilgangi að reyna að hindra þátttöku þeirra í þessum heimi og mikilvægt að uppalendur og fagfólk geri sér grein fyrir því að þátttaka í stafrænum veruleika nútímans felst ekki einungis í því að afla sér “alvarlegra” upplýsinga eða tileinka sér hefðbundin, opinber og viðurkennd menningargildi. Ungt fólk þarf á því að halda að við sem köllum okkur kennara séum opnari gagnvart tilraunastarfsemi og jafnvel hlutum sem almennt eru ekki taldir einkenna hefðbundnar menntastofnanir.
Nemendur sem nýta sér nútímatækni læra ekki síður af jafnöldrum en kennurum eða þeim sem eldri eru. Fagaðilar og foreldrar geta hins vegar haft umtalsverð áhrif á þetta óformlega nám sem og annan lærdóm t.d. hvað það varðar að setja náminu markmið, skorður.
Að mínu mati er ein af mikilvægari niðurstöðum rannsóknarinnar sú kenning (eða á ég að segja ábending?) að til þess að viðhalda mikilvægi sínu á 21. öldinni verða menntastofnanir dagsins í dag að þróast í takt við tímann. Eða eins og segir orðrétt í tveggja síðna útdrættinum:
Youths’ participation in this networked world suggests new ways of thinking about the role of education. What, the authors ask, would it mean to really exploit the potential of the learning opportunities available through online resources and networks? What would it mean to reach beyond traditional education and civic institutions and enlist the help of others in young people’s learning? Rather than assuming that education is primarily about preparing for jobs and careers, they question what it would mean to think of it as a process guiding youths’ participation in public life more generally.
Frekari upplýsingar
- Vefur rannsóknarverkefnisins (mjög hægvirkur). Inniheldur m.a. bókina Hanging Out, Messing Around, and geeking Out sem inniheldur rannsóknarniðurstöður og hægt er að sækja á pdf sniði endurgjaldslaust.
- Tveggja blaðsíðna samantekt á niðurstöður rannsóknarinnar (pdf)
- 58 blaðsíðna samantekt um niðurstöður (hvítbók)
