Rannsóknin byggir á viðtölum við níu kennara og þrjá rýnihópa nemenda. Á heildina litið töldu kennarar að með notkun Moodle mætti fá virkari og ábyrgari nemendur og að kerfið byði upp á sveigjanleika í námi sem hentaði jafnt í staðbundnu námi sem og fjarnámi. Ég birti hér ágrip úr nokkrum köflum sem mér þóttu sérstaklega bitastæðir en auðvitað mæli ég með því að þið lesið ritsmíðina í heild sinni.
Námsstjórnunarkerfi spara tíma og peninga
Það var samdóma álit allra kennaranna sem þátt tóku í rannsókninni að notkun Moodle hefði í för með sér vinnusparnað á einn eða annan hátt.
Innleiðingin var grasrótarstarf
Innleiðing Moodle virðist öðru fremur hafa verið framtak einstaklinga innan skólanna og ekki ákveðin eða skipulögð af skólayfirvöldum, sbr. eftirfarandi dæmi frá báðum skólunum:
Kennari í BHS: Þetta hefur verið að þróast úr grasrótinni, það er alveg hægt að segja að innleiðsla [Moodle] í okkar skóla hefur ekki komið ofan frá heldur í tengslum við verkefni sem kennarar hafa verið að taka að sér.
Persónulega finnst mér þetta mjög áhugaverð niðurstaða, sem þó kemur mér lítið á óvart verandi kennari í öðrum skólanum. Í ljósi þessa væri sannarlega fróðlegt að bera þessar niðurstöður saman við notkun á Moodle eða öðru námsstjórnunarkerfi innan skóla þar sem öðruvísi háttar til, þ.e. þar sem forysta, ábyrgð og frumkvæði að innleiðingunni kom að ofan. Grasrótin hefur vissulega sína kosti en ókostirnir eru einnig margir.
Það má einnig velta því fyrir sér hvers vegna á þessu standi því vissulega er þetta ekki raunin allstaðar. Er stjórnunin í umræddum skólum faglega veikburða? Er áhugi á hagnýtingu upplýsingatækninnar takmarkaður og þá hvers vegna?
Stefunmótun
Almennt virðist sú skoðun ríkjandi innan skólanna tveggja að skólastjórnendur hafi ekki haft mikið með skipulag á innleiðingu Moodle að gera né hafi tekið þátt í umræðum um leiðir til að gera notkunina útbreiddari og skilvirkari. Kallað er eftir markvissri stefnu innan skólanna, ekki bara áhuga eða upplýstu samþykki eins og staðan er í dag. Svo virðist sem skólastjórnendur séu almennt jákvæðir en hafi litla stjórn á því sem fram fer þar sem þeir hafi í raun sett starfsemina í hendur annarra.
Einn kennari óskaði eftir skólastjóra sem faglegum samstarfsmanni kennara. Það þótti mér mjög spennandi nálgun og ég er alveg sammála orðum þessa kennara:
Hvað hindranir á vegi innleiðingar varðar nefndu kennarar og nemendur þessar helstar:
Helstu hindranir sem kennarar nefndu:
- Vöntun á markvissri stefnu
- Skortur á hvatningu
- Ónógt aðgengi að tölvum
- Vandamál við innskráningar
- Léleg tölvufærni
- Ónóg tækniaðstoð
- Grunnmenntun og endurmenntun kennara í UST ekki nægjanleg
- Nemendur koma inn í framhaldskólana með of litla þekkingu í UST
- Fjárskortur
Nemendur telja helstu hindranir vera:
- Hefðir og venjur
- Tölvufærni kennara
- Að kennarar nenni þessu ekki
- Vöntun á stuðningi við fartölvunotendur
- Fjárskortur
Að mati nemenda réðu hefðir og venjur miklu um notkun á upplýsinga- og samskiptatækni í skólastofunni og kemur það væntanlega fáum á óvart sem kynnt hafa sér þessi mál. Nemendur bentu t.d. á að kennarar væru vanir að nota bækur og vildu halda sig við þær og sögðu að almennt virtust kennarar ekki vera vanir að nota tölvur í kennslu í bóklegum fögum.
Ég er á heildina litið mjög sammála helstu niðurstöðum rannsóknar Hafdísar og finnst þær staðfesta það sem ég hef fundið fyrir í eigin starfi við Fjölbrautaskólann í Breiðholti og víðar.
Frábært, set þetta strax á leslistann á NKN námskeiðinu. Spurning hvort ekki sé sniðugt að byrja með moodle innslag fljótlega þar.