Menntagátt var á sínum tíma ætlað að vera miðlæg upplýsingalind um kennsluefni og gagnvirk að því leiti að hver sem er gæti skráð þangað efni, eigið eða annarra. Gengu þau markmið ágætlega eftir og hýsir Menntagátt nú aragrúa upplýsinga og vísanir á námsefni fyrir öll skólastig. Það er hins vegar vafaatriði hvort annar ætlaður ávinningur af stofnun Menntagáttar hafi orðið að veruleika. Staðreyndin er sú að notkun á vefnum varð aldrei eins mikil og almenn og aðstandendur vonuðust til. Sýnist mér enda áhugi yfirvalda á Menntagátt eins og hún var frá upphafi hugsuð hafi minnkað til muna.
Ég veit að hugmyndavinna er hafin að nýrri eða allavega mikið breyttri Menntagátt. Mér var boðið á fund í Menntamálaráðuneytinu fyrir nokkru að taka þátt í þeirri vinnu, en sá mér því miður ekki fært að mæta þar sem ég hafði ráðstafað tímanum í annað. Ég hef engu að síður ákveðnar hugmyndir um Menntagátt, hvað hún ætti að vera eða öllu heldur hvað hún gæti orðið.
Eitt af því sem ég hef heyrt, er að vilji sé fyrir því að endurskapa Menntagátt frá grunni og jafnvel tengja hana annarri netlægri þjónustu á vegum Menntamálaráðuneytisins. Þannig gæti Menntagátt orðið yfirheiti margvíslegrar þjónustu sem tengist námi og kennslu s.s. námskrárgrunni, upplýsingum um framboð á námi á öllum skólastigum, innritun í framhaldsskóla og námsgagnagrunni. Ég veit að vilji er fyrir því að frjáls og opinn hugbúnaður leiki þarna lykilhlutverk og er það vel.
Nokkrar hugmyndir
Hvað mínar hugmyndir varðar þá er ég einna spenntastur fyrir félagslegu víddinni í vefjum sem þessum. Netið er öflugasta samskiptatæki veraldar og það ber að nýta það sem slíkt. Menntagátt á að vera lifandi samfélag um nám, námsefni og kennslu. Ég vil sjá öflugri tækifæri fyrir notendur að koma ábendingum, skoðunum og hugmyndum á framfæri. Það mætti jafnvel hugsa sér að notendur gæti metið skráð námsefni t.d. með einkunnagjöf eða stjörnugjöf líkt og tíðkast á Amazon eða IMDB vefjunum. Þannig tæku notendur virkan þátt í því að gæðastýra innihaldi vefsins auk þess sem vandað og vinsælt efni yrði aðgengilegra en áður. Umræða um notkun námsefnis og kennsluhætti væri líka vel til þess fallina að auka og bæta notkun þess. Slíka umræðu mætti vel tengja ákveðnu efni þannig að kennarar sem hafa notað viðkomandi efni gætu komið reynslu sinni á framfæri.
Notendur eiga einnig að taka þátt í því að flokka efni vefsins og þá ekki einvörðungu sá sem upphaflega skráir efnið. Þannig sé ég það t.d. fyrir mér að notendur eiga að geta hengt lykilorð við einstaka færslur, þ.e. “taggað” þær líkt og víðsvegar tíðkast á Netinu. Slík skráning auðveldar t.a.m. leit að efninu.
Listar líkt og tíðkast á Amazon eru líka sniðug verkfæri fyrir notendur sem vilja setja saman yfirlit um ákveðið efni. Þannig gæti kennari búið til lista yfir námsefni sem skráð hefur verið á Menntagátt og hentar vel til kennslu í tilteknum áfanga eða fagi.
Annars vil ég benda á spennandi fréttir af nýju framtaki bresku sem brátt verður hleypt af stokkunum, nefnilega „The National Digital Resource Bank“. Þar verður notast við spænskan hugbúnað sem nefnist Agrega og knýr sambærilega námsefnisgátt þar í landi. Svo virðist sem spænsk yfirvöld hafi samþykkt að gefa kerfið út samkvæmt opnu höfundarleyfi. það mætti kannski skoða það nánar?
Rétt er að taka það fram að ég er starfsmaður HugarAx og kom m.a. að fréttatengdu efni á Menntagátt á ákveðnu tímabili.
