sfjalar

Eitt af aðalsmerkjum vandaðra fjarnámsáfanga eru góð samskipti. Námsstjórnunarkerfi innihalda undantekningarlaust ýmis verkfæri til samskipta, s.s. tölvupóst, umræður og rauntímaspjall. Undanfarna mánuði hef ég gert tilraunir til að nota Meebo kerfið innan Moodle til rauntímasamskipta og hefur það reynst afskaplega vel.

Meebo hefur undanfarið verið að skapa sér gott nafn sem áreiðanleg samskiptalausn og nýta yfir 40 milljón manns um heim allan þjónustu fyrirtækisins, samkvæmt upplýsingum á vef þess. Meebo er ennfremur öllum ókeypis og mjög einfalt í notkun. Moodle inniheldur rauntímaspjall (chatroom) en alls ekki jafn aðlaðandi og Meebo því miður.

Ég nýti Meebo til rauntímasamskipta í Moodle á þann hátt að ég bý til spjallvettvang þar sem nemendur geta haft samband við mig ekki ósvipað og tíðkast með msn-spjallinu. Ég kynni þennan spjallkost sérstaklega í staðbundnum lotum og hvet nemendur til að hafa samskipti við mig á þennan máta þegar það á við. Á myndinni hér fyrir neðan má sjá hvernig Meebo spjallboxið verður hluti af Moodle umhverfinu.

Rauntímaspjall er mikilvægur þáttur í fjölmörgum áföngum sem ég kenni í gegnum Moodle. Helst hefur það komið gagni í hugbúnaðarkennslu, s.s. UTN 103 áfanganum þar sem kennd er grunnfærni í Powerpoint, Word og Excel. Í þessum áfanga er verkefnavinna mikil og því áríðandi að nemendur geti fengið sem fyrst lausn á vandamálum sem upp koma. Ég kenni m.a. þennan áfanga við Kvöldskólann í FB þar sem tímasókn er frjáls og vikulegar kennslustundir færri heldur en í almenna náminu. Áfanginn er einnig kenndur á blönduðu sniði (blended learning) og fer hann þá næstum alfarið fram í gegnum Moodle nema hvað opnir tímar eru einu sinni í viku. Eins og gefur að skilja er það mikill kostur fyrir nemendur að geta leitað aðstoðar hjá kennara þegar þannig er háttað.

Ég nota gjarnan Meebo rauntímaspjallið samhliða Jing á þann hátt að þegar nemendur senda fyrirspurnir í gegnum spjallið þá get ég sett saman skjámynd með skýringum á örstuttum tíma og sent til baka.

Uppsetning á Meebo í Moodle

• Til þess að nýta Meebo verður fyrst að skrá sig fyrir aðgangi í kerfið.
• Næsta skref felst í því að sækja kóðann á bak við spjallkerfið. Það er gert með því að velja Preferences>meebo me widgets. Kóðinn er sóttur með því að afrita textann í reitnum fyrir aftan Widget embed. Hægt er að útlitsmóta spjallboxið með því að smella á Modify hnappinn. Ég mæli með útlitsmótun því þar er hægt að setja titil á spjallið og birta nafn kennara.
• Þá er búin til ný HTML blokk í Moodle og kóðinn afritaður yfir í hana. Athugið að vera í kóðaham þegar það er gert.

Notkun á Meebo í Moodle

Til þess að taka á móti skilaboðu í gegnum Meebo verður viðkomandi að vera skráður inn í Meebo kerfið. Allra einfaldasta leiðin til að nota Meebo er að sækja agnarsmátt ókeypis forrit sem nefnist Meebo Notifier (einungis til á windows) og setja upp á þeim tölvum sem ætlunin er að nota með Meebo.

Meebo Notifier hvílir hljóðlátt á tækjastikunni neðst í hægra horni en birtir tilkynningarglugga um leið og einhver reynir að hafa samband í gegnum Meebo spjallið. Þegar smellt er á þessa tilkynningu opnast vefskoðari (ef hann er ekki þegar opinn) og hægt er að spjalla við viðkomandi.

Lítið mál er að spjalla við fleiri en einn aðila í einu í gegnum Meebo. Í slíkum tilfellum opnast fleiri spjallgluggar á Meebo vefnum í vefskoðaranum.