sfjalar

Mikið var ég glaður þegar ég opnaði tölvupóstinn minn í morgun og sá að þar biðu mín boð frá Google um að taka þátt í prófunum á Google Wave samskiptavettvangnum.

Ef ég á að reyna að lýsa Google Wave í sem fæstum orðum má segja að þar hafi verið sameinað í einn vettvang áður aðskildar samskiptaleiðir, þ.e. tölvupóstur, hefðbundinn umræðuvefur og rauntímaspjall og jafnvel Wiki. Google Wave er auk þess opinn vettvangur í víðum skilningi þess orðs.

Þjónustan byggir á opnum hugbúnaði (e. open source) en við hann má ennfremur forrita hvers kyns græjur (e. gadgets) og róbóta (e. robots) sem aukið getað notagildið eða eru bara til skemmtunar. Ég mæli með neðangreindu myndskeiði til að skilja betur á því hvað þarna er á ferðinni.

Það er ekki alveg augljóst við fyrstu kynni hvernig Google Wave í raun virkar og ég var smá tíma að átta mig á því hvernig ég ætti að bera mig að í þessu nýstárlega umhverfi. En þegar ég náði áttum sannfærðist ég um að þessi tækni gæti hæglega valdið straumhvörfum í samskiptum á Netinu. Tölvupóstur virkar afskaplega gamaldags við hliðina á Google Wave. Ég segi gæti valdið straumhvörfum því það fer allt eftir því hvort netverjar taki Wave fagnandi. Samskiptavettvangur er lítils virði ef fáir eru notendurnir. Nú efast ég ekki um að tölvunerðirnir hópist um þessa nýjung en Google verður að vinna til sín hinn venjulega notanda og það gæti reynst þrautinni þyngri. Wave vinnur einnig best á Google Chrome og sá vefskoðari er ekki með ýkja mikla markaðshlutdeild því miður.