Bækur og tímarit
Lagður er til verulegur niðurskurður á bókakaupum og tímaritsáskriftum.
Verði slíkur niðurskurður að veruleika legg ég til að bókasöfn skóla komi til móts við nemendur með auknum áherslum á stafrænt efni. Þetta má t.d. gera með því að bæta vefi bókasafna og vísa þar á stafrænt efni, handbækur og uppflettirit, orðabækur, kort, hugbúnað og bókmenntir. Af svo ótal mörgu er að taka.
Minna brottfall
Í tillögunum segir að símatskerfi skili fleiri nemendum til loka annar.
Upplýsingatæknin er kjörið verkfæri þegar kemur að fjölbreyttri verkefnavinnu og námsmati. Einnig gætu fjölmennir skólar nýtt betur nemendabókhaldið, í flestum tilfellum Innuna, til að, kortleggja stöðu nemenda hvað varðar námsframvindu og fjarvistir. Þannig væri hugsanlega hægt að greina vandamál fyrr og leggja til aðgerðir. Nú þekki ég að vísu ekki nógu vel hvernig Innan nýtist til þessara verka og það væri fróðlegt að fá ábendingar frá lesendum.
Nýting áfanga
Í tillögunum er lagt til að að fámennum áföngum sé haldið úti í fjarnámi eða með samkennslu.
Í þessu sambandi er hagnýting upplýsingatækninnar algjört lykilatriði. Ég vek t.d. athygli á því að skólar sem nýta Moodle námsstjórnunarkerfið geta samtengt kennsluvefina sína og einfaldað þar með alla nemendaumsýslu. Hér eru miklir og spennandi möguleikar í boði fyrir framsækna skóla og kennara. Hitt er verra mál að stjórnvöld hafa boðað 50% niðurskurð á nemendaígildum í fjarnámi og kvöldskóla. Það má því segja að öll sóknarfæri á þessum vettvangi hafi verið stórlega skert. Það er stórlega vanhugsað að mínu mati að skerða möguleika fólks til náms á þennan hátt.
Hugbúnaður
Undir þessum lið er lagt til að skólar leiti ódýrra leiða varðandi kennsluumsjónarkerfi og ennfremur kanni hvar megi nota hugbúnað sem ekki þurfi að borga fyrir.
Hér er auðsjáanlega verið að vísa í notkun á opnum og frjálsum hugbúnaði og er það vel. Reynsla okkar í FB hefur sannfært mig um að með skynsamlegri nýtingu á opnum hugbúnaði geti skólar aukið gæði náms og kennslu og sparað um leið stórar fjárhæðir. Moodle námsstjórnunarkerfið er augljós valkostur þeirra sem vilja nýta opið kennsluumsjónarkerfi enda hefur notkun þess hér á landi stóraukist á síðustu árum og Moodle er í dag mest notaða námsstjórnunarkerfið hér á landi.
Hitt er annað mál að það vantar tilfinnanlega vettvang fyrir skólastjórnendur, kennara og aðra sem vilja nýta opinn hugbúnað er leitast við að afla sér upplýsinga um það sem í boði er. Því hef ég lagt inn styrkbeiðni til Sprotasjóðs um hönnun og rekstur á vef þar sem hægt verður að leita sér upplýsinga og reynslu af fjölbreyttum hugbúnaði og netlægri þjónustu sem nýtist í námi og kennslu. Ég er mátulega bjartsýnn á jákvætt svar.
Eignakaup
Hér er lagt til að skoðað verði hvort fríkerfi uppfylli þarfir stofnana. Ennfrumeur að skilgreina hvaða forrit séu mikilvæg og hvort finna megi ódýrari valkosti. Loks er lagt til að gerð sé þarfagreining á kostum og göllum þess að vinna með opinn hugbúnað.
Í raun er þetta sama umræðan og í liðnum hér að ofan. Spurningin snýst um notagildi og hagkvæmni opins hugbúnaðar. Eins og gefur að skilja fer svarið alfarið eftir því hver er spurður. Spurðu framkvæmdastjóra Microsoft á Íslandi og hann mun fullyrða að þegar allt er lagt saman þá er opinn hugbúnaður dýrkeyptari en séreignahugbúnaður. Spurðu gallharðann áhugamann um opinn hugbúnað og hann mun fullyrða að opinn og frjáls hugbúnaður sé í flesta staði sambærilegur að gæðum og í mörgum tilfellum betri auk þess sem hann skili fjárhagslegum ávinniningi. Persónulega held ég að það geti verið mjög erfitt að finna algilt svar. Reynsla okkar í Fjölbrautaskólanum í Breiðholti á innleiðingu á Joomla vefumsjónarkerfinu og Moodle námsstjórnunarkerfinu hefur verið afar jákvæð bæði hvað gæði og kostnað varðar. Ég get ekki ímyndað mér að það sé nokkur áhugi þar innanhúss að auka notkun á séreignahugbúnaði og frekar hið gagnstæða. Hvað varðar innleiðingu á Linux stýrkierfinu og forritum eins og OpenOffice.org þá fylgist ég eins og svo margir aðrir mjög vel með frumkvöðlunum í MA og VMA. Þar eru sannarlega spennandi hlutir að gerast.
Á Akureyri (flokkað sérstaklega í tillögunum) er lagt til að innleiðing á Open source verði þróuð í VMA og MA. Einnig að menntamálaráðuneytið veiti skólum sérfræðiaðstoð til að auðvelda innleiðingu í öllum stofnunum. Ennfremur að sameiginleg verkefni eins og t.d. notendahandbók verði kostuð af stjórnvöldum, skólar leiti verðtilboða í innleiðingu og tæknimenn skóla vinni með starfsfólki að innleiðingu í daglegu starfi.
Það kemur ekki skýrt fram í tillögunum en mig grunar að hér sé fyrst og fremst átt við innleiðingu á Linux og OpenOffice. Það er sjálfsagt og eðlilegt að læra vel að þeirri þróunarvinnu sem nú á sér stað innan MA og VMA hvað varðar innleiðinu á opnum hugbúnaði en um leið má ekki draga úr mikilvægi þróunarvinnu annarra skóla sem í lengri tíma hafa nýtt opinn hugbúnað í skólastarfi. Hér má t.d. nefna Fjölbrautaskólann í Breiðholti og Borgarholtsskóla sem hafa verið leiðandi í notkun á Moodle námsstjórnunarkerfinu. Fjölmargir aðrir skólar nota margvíslegan opinn hugbúnað í námi og kennslu og ber að læra af þeirri reynslu einnig. Að mínu viti þyrfti að horfa heildstætt á þessi mál og setja upp einhversskonar samstarfsvettvang skóla sem eru að vinna með eða hafa áhuga á því að vinna með opinn og frjálsan hugbúnað.
Ferðakostnaður innanlands
Hér er lagt til að skipuleggja fundi og námskeið með fjarfundabúnaði þar sem það á við.
Þetta er góð tillaga. Einnig má nýta fjölbreyttar, netlægar þjónustur til samstarfs og samskipta. Ég get nefnd wikivefi, umræðukerfi, netsíma (t.d. skype), skráarhýsingar (s.s. dropbox) og fleira. Tæknin er öll til staðar og í mörgum (gott ef ekki flestum) tilfellum hægt að nýta hana endurgjaldslaust.
Hér hefur einungis verið stiklað á stóru en eins og sjá má kennir margra grasa í tillögunum sem framhaldsskólar landsins hafa að vinna úr.
