sfjalar » Margmiðlun

Animoto

sfjalar — Sun, 27 Mar 2011 15:56:10 +0000

Animoto er líklegast þekktasta þjónustan sem stendur netverjum til boða sem vilja blanda saman myndum, tónlist og myndskeiðum á ofur einfaldan og skemmtilegan hátt.

Það sem gerir Animoto svo aðlaðandi er hversu einfalt er að setja saman vönduð og grípandi myndskeið. Það eina sem notandinn gerir er að velja tilbúið útlit, myndir og tónlist. Animoto sér svo um alla erfiðsvinnuna.

Einfaldleikinn kostar reyndar sitt því notendur Animoto hafa ekki mikla stjórn á því hvernig myndskeið þeirra líta út að lokum. Það er helst hvað varðar myndir, myndskeið og tónlist sem notendur hafa val. Endanleg útfærsla er í höndum Animoto og ræðst af sniðmáti og tónlist. Þetta er í senn kostur og ókostur. Það er kostur að geta sett saman flott myndskeið með tónlist og myndum með lítill fyrirhöfn og á stuttum tíma, en það er ókostur að geta ekki ráðið meira um framsetninguna.

Notkun

Eins og áður segir þá er Animoto sérlega einfalt í notkun. Hér fyrir neðan má sjá hversu auðvelt er að setja saman stutt myndskeið.

Notagildi í skólastarfi

Animoto er áhugaverður vettvangur til að vinna með myndir og tónlist og má m.a. nýta til að setja saman myndasýningar t.d. í tengslum við afmörkuð verkefni, vettvangsferðir eða heimsóknir. Ég kynnti Animoto nýlega fyrir nemendum mínum á starfsbraut FB sem notuðu hana til að setja saman stutt myndskeið um áhugamál sín. Hér eru nokkur sýnishorn: Breakdance, Downhill, og veggjakrot.

Sérstakur aðgangur fyrir kennara

Allir sem áhuga hafa geta stofnað eigin aðgang að Animoto og sett saman hálfrar mínútna löng myndskeið án endurgjalds. Ókeypis aðgangur að Animoto leyfir notendum að velja úr takmörkuðu úrvali sniðmáta sem geta innihaldið allt að ljósmyndir í takmarkaðri upplausn. Aðgangur að auknum möguleikum Animoto kostar sitt, en kennarar geta sótt um sérstakt kennaraleyfi með lítilli fyrirhöfn og fengið ótakmarkaðan aðgang að þjónustunni fyrir sig og 50 nemendur. Fullur aðgangur að Animoti gefur notendum meira svigrúm til sköpunar þegar kemur að gerð myndskeiða.

Kennaraaðgangurinn er veittur til nokkurra mánaða í senn með möguleika á framlengingu þegar hann rennur út.

Qwiki – framtíð þekkingarmiðlunar á Netinu?

sfjalar — Sun, 07 Nov 2010 12:45:52 +0000

Qwiki er nýstárleg leitarvél sem skilar niðurstöðum frá mörgum ólíkum efnisveitum, texta, myndum og myndskeiðum á samræmdu, gagnvirku margmiðlunarsniði. Að sögn er hugmyndin að þjónustunni fenginn að láni úr heimi kvikmyndanna.

Við fyrstu sýn er Qwiki lítið frábrugðin hefðbundnum leitarvélum þar sem notandinn slær inn leitarorð eitt eða fleiri og fær um hæl langan lista með fjölbreyttum niðurstöðum.

Það er hins vegar framsetningin á niðurstöðum leitarinnar sem skilur á milli Qwiki og venjulegra leitarvéla. Á meðan almennar leitarvélar finna stakar vefsíður, myndir eða myndskeið þá sameinar Qwiki allt framangreint í gagnvirkt myndskeið með tali. Hér má sjá hvað gerist þegar leitarorðið “moodle” er slegið inn í Qwiki.

Qwiki er ennþá á þróunarstigi og aðgangur takmarkaður. Eins og sjá má er þjónustan þó vel nothæf og gefur all góða mynd af því hvaða hugmyndir forsvarsmenn hennar gera sér um framsetningu miðlun þekkingar á Netinu. Sjálfur tel ég þessa nálgun áhugaverða og svo sannarlega er það góðra gjalda vert að móta lifandi frásögn með tali og myndum úr öllum þeim aragrúa gagna sem liggja öllum opin á netinu. Og það er einmitt markmið þeirra sem standa að Qwiki, að breyta hráum upplýsingum í upplifun. Þeim er hins vegar mikil vandi á höndum eins og berlega kemur í ljós þegar leitað er eftir upplýsingum á Qwiki. Það vantar ekki að gögnin eru framreidd á aðlaðandi og eftirtektarverðan hátt, en allt og oft eru upplýsingarnar yfirborðskenndar og stundum jafnvel fátæklegar. Myndir og texti falla iðulega illa saman og ósjaldan vantar tilfinnanlega myndir í frásögnina. Allt á þetta eðlilegar ástæður. Textinn er að stórum hluta fenginn frá Wikipedia, myndskeið frá Youtube og myndir að miklum hluta til frá Wikipedia commons og Flickr. Allt verður þetta efni að vera aðgengilegt samkvæmt opnum höfundarleyfum sem takmarkar auðvitað framboðið. Það magnaða við Qwiki er samt að efnið er sett saman í rauntíma.

Qwiki gagnast vel þegar ætlunin er að fá einfalt yfirlit yfir tiltekið efni og sem slík mun þjónustan henta mjög vel í skólastarfi. Ég væri einnig mjög spenntur að geta sett saman mitt eigið efni á þennan hátt og skilst mér að sú verði raunin í náinni framtíð.

Sjálfsagt er að geta þess að ekki eru allir hrifnir af þessu framtaki og fara ekki leynt með þá skoðun sína.

Ef einhverjir hafa áhuga á því að kynna sér Qwiki betur þá á ég boðsmiða. Skráið athugasemd við þessa færslu og ég sendi passa um hæl.

Öskufall og upplýsingatækni

sfjalar — Thu, 15 Apr 2010 19:50:15 +0000

Viðfangsefni dagsins í tölvukennslunni hjá mér á starfsbraut var smíði forsíða í Microsoft Word. Ég byrjaði hins vegar tímann á því að kynna vefinn flightradar24 fyrir nemendum mínum, en þar er hægt að fá myndræna sýn á flugumferð í Evrópu.

Ástæðan var að sjálfsögðu sú að vegna öskufalls frá eldgosinu í Eyjafjallajökli þá liggur flug niðri á stórum svæðum á hinu evrópska flugumferðarsvæði. Þetta má glögglega sjá á flightradar. Flightradar er auk þess lifandi vefur og hægt að uppfæra upplýsingarnar á allt að 10 sek. fresti. Ímyndið ykkur bara möguleikana í kennslu og ekki bara þegar það gýs á íslandi.

Ásamt því að fá greinargóða yfirsýn yfir flugumferð yfir Evrópu er hægt að kalla fram ítarlegar upplýsingar um hverja einustu flugvél sem birtist á kortinu. Þannig er hægt að sjá flugnúmer, hraða og hvert ferðinni er heitið. Á myndinni hér fyrir neðan má t.a.m. sjá flug FI520 á leið frá Íslandi til Frankfurt Am Main í Þýskalandi.

Sýndarferðir um staði á Heimsminjaskrá UNESCO

sfjalar — Sat, 05 Dec 2009 17:18:56 +0000

Google og UNESCO, Menningarmálastofnun Sameinuðu þjóðanna, hafa sameinast um að gera aðgengilegt á Netinu myndefni af völdum stöðum af heimsminjaskrá UNESCO á Google Earth og Google maps kortavefnum.

Heimsminjaskrá var stofnuð árið 1972 er skrá yfir staði sem tilnefndir hafa verið sem þjóðminjar af alþjóðlegri heimsminjaáætlun (International World Heritage Programme). Tilgangur skráarinnar er varðveisla staða sem teljast sérstaklega merkilegir frá mennignarlegu og/eða náttúrufræðilegu sjónarmiði og eru taldir hluti af menningararfi mannkyns (Wikipedia). Til þess að fá samþykki á heimsminjaskrá þarf viðkomandi staður að vera einstakur í heiminum og gerðust Íslendingar aðilar að henni árið 1995. Þegar þetta er skrifað inniheldur skráin 890 staði um heim allan, þar á meðal Þingvelli og Surtsey.

Nú þegar hefur samstarfsverkefni Google og UNESCO fært okkur netverjum 19 staði af Heimsminjaskrá að vafra um í þrívídd á Google Maps, Google Earth eða þinni eigin vefsíðu því á einfaldan hátt er hægt að varpa þrívíddarumhverfinu á hvaða vef sem er. Hér fyrir neðan gefst lesendum tækifæri að rölta í rólegheimum um Stonehenge. Ímyndið ykkur bara möguleikana í námi og kennslu.

View Larger Map

Hér eru aðrir staðir sem hægt er að skoða á sambærilegan hátt:

Yfirlit yfir alla staðina sem þegar hafa verið myndaðir í þrívídd má finna hér. Hér fyrir neðan má einnig sjá kynningarmyndband frá Google um samstarfsverkefnið.

Á komandi mánuðum má búast við enn fleiri stöðum af Heimsmynjaskrá á Google Maps. Ég bíð spenntur þangað til.