Ég held hins vegar að stjórnendur Blackboard séu farnir að naga sig í handarbökin vegna ákvörðunarinnar nú þegar opnar lausnir á við Sakai og ekki síst Moodle eru farnar að höggva alvarleg skörð í kúnnahóp fyrirtækisins. Þessar grunsemdir mínar fengu byr undir báða vængi þegar ég frétti af nýjasta útspili Blackbord, nefnilega ókeypis þjónustu fyrir einstaklinga. Það var Ray Henderson, forstjóri Blackboard Learn sem opinbera þessa stefnubreytingu í viðtali við Jeff nokkurn Young.

Hin ókeypis útgáfa virðist fyrst og fremst miðuð að einstaka kennurum enda vill Blackboard ekki keppa við sjálft sig. Stofnanir eða skólar sem þegar nýta kerfið geta því varla vænst þess að græða mikið á þjónustunni. Á hinn bóginn gæti þessi mótleikur gefið kennurum tækifæri til að prufukeyra Blackboard án nokkurs tilkostnaðar og fyrir einstaka kennara verður þetta vafalítið kærkomin nýjung.

Fyrsta skref þýðandans er að afmarka sig, þ.e. velja tungumál og orðasafn. Þegar það hefur verið gert birtast þýðingarstrengirnir og hægt er að hefja sjálfa þýðingarvinnuna. Sér til aðstoðar hafa þýðendur Google þýðingarvélina, en hægt er að kalla fram sjálfvirka þýðingu á hverjum streng með því að smella á Google táknið neðst í enska frumtextanum. Ekki þarf að vista þýðingar sérstaklega. Vistun er sjálfvirk.

Allir þýddir strengir safnast saman á svonefndu sviði (e. stage) sem er tímabundinn geymslustaður. Varast ber að skrá sig úr kerfinu á þessum tímapunkti þar sem þýddir strengir hverfa af sviðinu hafi þeir ekki verið viðstaðir eða sendir til umsjónaraðila viðkomandi þýðingarpakka. Almennir þýðendur geta svo sent eigin þýðingar til umsjónaraðila þýðingarpakka sem hefur það hlutverk að yfirfara þýðingar og samþykkja. Til þess að senda þýðingar á þýðingaraðila er fyrst smellt “Push all staged strings into a new stash” hnappinn (ágætt að gefa þýðingarlotunni lýsandi tiltil fyst) til að vista þýðinguna. Þar næst smellt á “Stashes” krækjuna í vinstri dálki og “Pull request” hnappinn hægra meginn við viðkomandi þýðingu. Látið fylgja athugasemd ef þörf krefur.

Þegar þýðingar hafa verið samþykktar af umsjónaraðila og þar með orðnar hluti af viðkomandi þýðingarpakka fær þýðandinn tölvupóst. Þegar þýðing hefur verið samþykkt er góð regla að fjarlægja hana með því að smella á “Drop” hnappinn í “Stash” viðmótinu.

Ég hvet alla Moodle notendur til að skrá sig sem notendur á AMOS og taka virkan þátt í þýðingarstarfinu. Moodle 2.0 er væntanlegt og það er mjög mikilvægt að hafa lokið við að þýða alla helstu þætt kerfisins áður en það fer í almenna notkun. Það væri vel þegið að verðandi þýðendur hefðu samband við mig svo við getum í sameiningu lagt línurnar hvað varðar þýðingarvinnuna.

Moodle 2.0:

• Lítur miklu betur út. Gjörbreyting er á virkni og uppsetningu sniðmáta/þema og meiri sveigjanleiki í boði hvað varðar hönnun. Ný grunnsnið munu fylgja útgáfunni og væntanlega verður þess ekki lengi að bíða að netverjar láti reyna á nýju möguleikana.
• Mun gera fjölmarga hluti á annan hátt en fyrri útgáfur enda mikið af nýjum kóða. Það má því allt eins búast við nokkru umstangi við uppfærslu úr útgáfu 1.x yfir í 2.0. Notendur sem eru með uppsettar útgáfur eldri en 1.9 verða að uppfæra í Moodle 1.9 áður en uppfært er yfir í 2.0. Ég veit ekki nákvæmlega hvernig þessum málum verður háttar en ég veit þó að gera verður breytingar á öllum sniðmátum eigi þau að vera samhæfð við Moodle 2.0. Ég geri einnig ráð fyrir því að fjölmargar (kannski flestar) viðbætur verði að aðlaga að nýju útgáfunni.
• Inniheldur nýtt viðmót á prófakerfinu. Þar að auki hafa fjölmargar lagfæringar verið gerðar á prófahlutanum.
  
• Skartar uppfærðu bloggkerfi en getur auk þess tengst öðrum blogglausnum, .s.s Blogger eða WordPress. Hér má lesa meira um þetta verkefni.
• Getur tengst vefþjónustum (e. web services).  Þetta er mikilvægt skref sem á eftir að bjóða upp á fjöldan allan af spennandi möguleikum.
• Getur átt samskipti við útværar gagnahirslur (e. repositories). Þessi kostur gerir notendum kleift að tengjast netlægum þjónustum eins og t.d. Flickr, Box.net, Picasa, Youtube, Google Docs eða Mahara svo fátt eitt sé nefnt. Sem dæmi um hvað þetta þýðir í raun þá geta kennarar sótt efni úr gagnahirslu sem þeir hafa aðgang að, t.d. myndir úr Flickr, beint úr Moodle ritlinum. Hér má lesa meira um gagnahirslur og Moodle 2.0.
• Meðhöndlar skrár á allt annan hátt en áður. Moodle 2.0 geymir upplýsingar um skrár í gagnagrunni og er það grundvallarbreyting frá því sem var. Þessi breyting þýðir m.a. að mögulegt er að samnýta skrár á milli áfanga. Á hinn bóginn verður ekki lengur hægt að “ftp-a” skrám beint inn í möppur í áföngum.
• Leyfir athugasemdir (e.comment) við öll aðföng og viðföng. Ég er mjög hrifinn af þessum möguleika og á örugglega eftir að virkja hann í minni kennslu þegar þar að kemur.
  
  Athugasemdirnar virka þannig að kennari setur blokk við aðföng eða viðföng þar sem hann vil gefa kost á athugasemdum.
• Gerir kennurum kleift að skilgreina lærdómsviðmið (e. outcomes). Lærdómsviðmið eru skilgreiningar á færni/leikni, þekkingu og hæfni sem einstaklingur hefur tileinkað sér við námslok (sjá þessar orðaskýringar).
• Inniheldur almennilegan ritil. HTMLArea ritillinn sem Moodle hefur skartað fram til þessa er löngu úreltur. Moodle 2.0 inniheldur sérsniðna útgáfu af TinyMCE ritlinum sem er forritaður í Javascript og keyrir í öllum helstu vefskoðurum.
  
  Nýi ritillinn einfaldar til muna efnisvinnslu svo ekki sé minnst á alla nýju eiginleikana sem hann inniheldur.
• Býður upp á skilyrtan námsferil. Með því á ég við að hægt er að stýra aðgengi nemenda að t.d. verkefni eða prófi með ákveðnum forkröfum. Nemandi fær t.a.m. ekki aðgang að verkefni 2 fyrr en hann hefur lokið verkefni 1 með fullnægjandi árangri.
  
  Ég veit að þetta er virkni sem margir hafa beðið lengi eftir. Þar á meðal ég sjálfur.
• Er kröfuharðari en fyrirrennarar sínir. Moodle 2.0 gerir t.a.m. lágmarkskröfur um PHP 5.2.8.

Auk ofangreindra nýjunga hafa ótal lagfæringar stórar jafn sem smáar verið gerðar á Moodle.

Nokkrir mánuðir munu líða frá fyrstu betaútgáfu þangað til nothæf útgáfa mun líta dagsins ljós. Sá tími verður nýttur í ítarlegar prófanir sem allur almenningur hefur kost á að taka þátt í. Ég mun fjalla mun betur um Moodle 2.0 í náinni framtíð.

Heimildir

Did You Know Moodle 2.0 Will….?
Moodle 2.0 release notes
Moodle 2.0 Roadmap

Eftir dóminn sl. föstudag er ljóst að hver einasti framleiðandi, þjónustu-, og söluaðili netbundinna námsstjórnunarkerfa annar en Blackboard vestanhafs (og reyndar víða því Blackboard hefur sótt um einkaleyfi um allan heim) verður að huga vel að stöðu sinni og framtíð. Óverðskuldað einkaleyfi Blackboard hefur sett fyrirtækið í þá einstöku aðstöðu að geta ekki einungis þvingað skaðabætur frá samkeppnisaðilum heldur krafið þá um greiðslur fyrir afnot af lögvernduðu höfundarverki “þeirra”. Einu aðilarnir sem geta verið öruggir um sinn hag, ef eitthvað er að marka orð Blackboard, eru notendur og þróunaraðilar opins hugbúnaðar, en Blackboard hefur heitið að skerða ekki hár á höfði þeirra.

Blackboard er lang stærsti framleiðandi námsstjórnunarkerfa í heiminum í dag og úrskurðurinn frá því á föstudaginn eykur enn á ægivald þeirra yfir keppinautum sínum á markaði. Ég efast ekki um að viðbrögð Netverja og hins akademíska umhverfis verði öll á sama veg og Blackboard ekki í hag. Einkaleyfi fyrirtækisins er enda fyrst og fremst til þess fallið að hindra eðlilegt og sjálfsagt þróunarstarf, takmarka nýsköpun og koma í veg fyrir opið streymi upplýsinga og fagleg skoðanaskipti.

Stærsti Blackboard notandi á Íslandi er líklegast Kennaraháskóli Íslands. Aðrir Blackboard skólar eru t.d. Verslunarskóli Íslands, Fjölbrautaskólinn við Ármúla, Menntaskólinn í Kópavogi og Fræðslumiðstöð Reykjavíkurborgar. Þessir aðilar mega í náinni framtíð vel eiga von á hækkandi leyfisgjöldum sem víst eru nógu há fyrir og lélegri þjónustu. Það er segin saga að þegar eðlileg samkeppni fæst ekki þrifist þá leiðir það til hækkandi verðlags og verri þjónustu. Verði ykkur að góðu.

Almenn ánægja meðal stærri fyrirtækja

Almenn ánægja meðal smærri og meðalstórra fyrirtækja

Almenn ánægja meðal menntastofnana

Hér fyrir neðan má svo sjá helstu niðurstöður rannsóknarinnar hvað varðar hindranirnar í notkun og innleiðingu netbundinna námsumhverfa. Eins og búast mátti við er fjárhagslegur kostnaður mikilvægur þáttur. Stuðningur við notendur er í
öðru sæti og endurstrikar sú niðurstaða enn og aftur mikilvægi fræðslu og virkrar aðstoðar við notendur.

Þegar notendur voru spurðir um mikilvægustu þætti netbundinna námsumhverfa kom margt athyglisvert upp á yfirborðið. Það er t.d. áhugavert að lesa að rétt tæplega 79% þátttakenda töldu skýrslur og mælingar mikilvægasta þátt. Miðlun efnis kemur þar strax á eftir og í þriðja sæti mat. Þessar niðurstöður eru í ágætu samræmi við mína tilfinningu af notkun kerfanna, þ.e. að þau eru fyrst og fremst hugsuð sem verkfæri fyrir kennara.

Hugleiðið þessar niðurstöður:

• Rétt tæplega 30% aðspurðra stefna að því að uppfæra eigin lausn og tæplega 11% ætla sér að skipta um lausn
• Moodle er útbreiddasta kerfið meðal smærri skólastofnanna og fyrirtækja, þ.e. innleiðingar þar sem notendur eru 5000 eða færri
• 21% notenda segjast nýta meira en eitt netbundið námsumhverfi

Heimildir:

Learning Management System – LMS – Satisfaction
Elearningguild

• Aðgengi
  Moodle 1.8 styður við alla helstu alþjóðlegu aðgengistaðla. Frekari vinna á þessu sviði er áætluð enda mikil áhersla lögð á aðgengi notenda í Moodle.
• Moodle netkerfið
  Nú er hægt að tengja einstaka Moodlevefi saman og mynda þannig net Moodlevefja. Þetta er mjög spennandi eiginleiki sem einfaldar t.a.m. skólum að vinna saman og bjóða upp á sameiginlega áfanga. Frekari vinna á þessu sviði er áætluð.
• Heimildir og hlutverk
  Í kjölfar fjölda ábendinga frá notendum hefur heimilda og hlutverkakerfi Moodle, sem kynnt var til sögunnar í síðustu útgáfu, verið endurbætt til muna.

Ítarlegt yfirlit yfir nýjungar og endurbætur í Moodle 1.8 má finna hér. Moodle 1.8 má sækja á vefum Moodle.org. Uppfærsla á íslenska tungumálapakkanum er væntanleg innan nokkurra daga.

Þetta er brot af þeim skilaboðum sem felast í stuttmyndinni sem hér fer á eftir og ég hvet kennara, foreldra og aðra þá sem hafa áhuga á námi og kennslu að horfa á.

Framtíðin er vissulega þeirra en ábyrgðin er okkar.

Yfirlýsing Blackboard kemur í kjölfar samþykkis einkaleyfisstofunar bandarísku á ósk Software Freedom Law Center um endurskoðun á fyrrgreindu einkaleyfi, ósk sem SFLC kom á framfæri að beiðni þriggja aðila sem standa á bak við nokkur sterkustu opnu námsumhverfin á Netinu, þ.e. Sakai stofnunarinnar, Moodle samfélagsins og ATutor samfélagsins. Þess má geta að forvígismenn Blackboard hafa frá upphafi haldið því fram að fyrirtækið muni ekki beita sér gegn opnum hugbúnaði og er því eðilegt að lesa tilkynninguna í dag sem bindandi staðfestingu á því.

Ástæður þess að Blackboard kýs að birta þessa yfirlýsingu í dag eru að öllum líkindum markaðslegar í eðli sínu og ætlað að fegra aðeins skaddaða ímynd fyrirtækisins. Yfirlýsingin hefur engin áhrif á málatilbúnað Blackboard gegn helsta samkeppnisaðila sínum Desire2Learn og tímasetningin er örugglega engin tilviljun. Það er að sjálfsögðu óskandi að stjórnendur Blackboard sjái að sér og láti af augljósri misnotkun sinni á úreldu einkaleyfakerfi . Því miður bendir ekkert til að svo muni verða í náinni framtíð.

Sakai stofunin og Educause hafa þegar sent frá sér sameiginlega tilkynningu vegna yfirlýsingar Blackboard.

Ég hef fjallað um þetta efni áður og er sammála þeim fjölmörgu aðilum sem telja veitingu einkaleyfisins sorgleg mistök. Sem betur fer er ennþá nægur tími til að bæta úr því sem miður hefur farið og vonandi leiðir væntanleg endurskoðun leyfisins til niðurfellingu þess.

Þess má geta að Blackboard námsumhverfið hefur verið nýtt hér á landi í verkefninu Tölvutök. Ég hef verið að heyra misjafnar fréttir af gangi þess og það væri mjög fróðlegt að fá að heyra um hvernig þau mál standa. Það væri einnig fróðlegt að heyra frá Menntasviði RVK um framtíðaráætlanir þeirra hvað varðar innleiðingu Blackboard í grunnskóla borgarinnar.

Fyrir valinu varð Moodle 1.6 námsumhverfið og hafa nú fyrstu niðurstöður úr rannsókn á vegum skólans verið gefnar út, en í rannsókninni voru WebCT og Moodle kerfin borin saman með það í huga að kanna kosti þess að innleiða Moodle í stað WebCT.

Skýrslan er mjög áhugaverð aflestrar og t.d. fróðlegt að skoða athugasemdir nemenda og kennara sem vanir eru WebCT en fá nú tækifæri til þess að reyna aðra lausn. Eins og gefur að skilja eru viðbrögðin fjölbreytt og skoðanir mjög ólíka, en á heildina litið voru bæði nemendur og kennarar mjög sáttir við Moodle.

Í kjölfar frumkönnunarinnar hefur verið ákveðið að kanna betur möguleika Moodle áður en endanleg ákvörðun verður tekin um val á námsumhverfi framtíðarinnar fyrir skólann.

Hér á landi stendur í það minnsta einn skóli í svipuðum sporum og Idahoe State University og á ég þar við Kennaraháskóla Íslands. KHÍ nýtir WebCT námsumhverfið, að vísu nýrri útgáfu en ISU. Á næsta ári stendur KHÍ frammi fyrir því að WebCT notendaleyfið rennur út og því verður skólinn annað hvort að endurnýja leyfið, hvort sem það felur í sér uppfærslu eða ekki, eða velja annað námsumhverfi. Innleiðing á nýju námsumhverfi er ekki léttvæg ákvörðun og kallar á mikinn undirbúning og mikla vinnu allra sem að koma. Það er því alla jafnan hentugast fyrir skóla að halda áfram að nýta það kerfi sem reynst hefur vel og kennarar og nemendur þekkja. En hvers vegna ætti KHÍ þá að íhuga nýja lausn? Hvers vegna ekki að halda áfram með WebCT?

Það er hægðarleikur að finna fjölmargar ástæður til að réttlæta val á einni hugbúnaðarlausn umfram aðra. Ég ætla ekki að gera það hér. Vangaveltur mínar snúast ekki um einstaka hugbúnað þrátt fyrir ofanritað heldur heildarsýn á notkun upplýsingatækninnar í námi og kennslu við KHÍ og framkvæmd þeirrar sýnar. Um þessar mundir stendur yfir ein umfangsmesta endurskoðun á námi við KHÍ sem farið hefur fram. Það væri fróðlegt að vita hvort hlutverk upplýsingatækninnar hafi verið rætt í þeirri stefnumótunarvinnu og ef svo er hvert það hlutverk eigi að vera í nýju kennaranámi?

Hvað WebCT varðar þá verður það auðvitað ekki undanskilið þegar kemur að gagnrýnni umræðu um hlutverk upplýsingatækninnar innan KHÍ og engan vegið sjálfgefið að sú lausn henti endurskoðuðu námi við skólann. Netbundið námsumhverfi gegnsýrir stóran hluta af því starfi sem fram fer innan skólans og hefur áhrif á vinnu og verklag bæði nemenda og kennara. Ég hvet því starfsfólk, stjórnendur og ekki síst nemendur KHÍ til þess að velta vandlega fyrir sér kostum og göllum núverandi námsumhverfis á Netinu, hlutverki þess og notkun. Sjálfur hef ég fjölmargar spurningar sem fróðlegt væri að fá svör við:

Kostnaður

• Hvað er KHÍ að greiða í leyfisgjöld fyrir WebCT í dag og hversu há verða leyfisgjöldin við endurnýjun leyfisins á næsta ári?
• Hvernig er samsetning leyfisgjaldanna? Er greitt fyrir einstaka námskeið í kerfinu eða fjölda notenda?
• Hver er kostnaður KHÍ við hýsingu kerfisins og þjónustu sem henni tengist?

Notkun og viðmót

• Hvernig er notkun kennara á WebCT háttað? Er réttlætanlegt að greiða háar fjárupphæðir í leyfisgjöld fyrir hugbúnaðarlausn sem ekki er nýtt nema að takmörkuðu leyti? Hversu stórt hlutfall kennara innan KHÍ nýtir WebCT til annars en miðlunar á efni, tölvupóstsamskipta og einfaldra umræðna, þ.e. þátta sem auðveldlega má leysa með litlum tilkostnaði án sérhæfðrar hugbúnaðarlausnar eins og WebCT. Uglan hentar t.a.m. ágætlega til þessara verka.
• WebCT er ekki til í íslenskri þýðingu. Er ekki sjálfsagt að netbundið námsumhverfi íslenskra háskóla sé á íslensku?
• Hversu ánægðir eru nemendur KHÍ með WebCT og notkun þess? Hefur það verið kannað? Vitum við hvaða væntingar nemendur hafa til netbundins námsumhverfis og hvernig KHÍ er að koma til móts við þær væntingar?
• Hversu ánægðir eru kennarar KHÍ með WebCT? Vitum við hvaða væntingar kennarar skólans hafa til netbundins námsumhverfis og hvernig skólinn er að koma til móts við þær væntingar?
• Liggur ákveðin kennslufræði á bak við notkun WebCT við KHÍ? Hver er hún og hvernig stutt við hana?

Þróun og framsækni

• Eins og þekkt er þá keypti Blackboard fyrirtækið WebCT og nokkuð ljóst að fyrirtækið mun ekki bjóða upp á tvær sjálfstæðar lausnir
• sem keppa hvor við aðra á sama markaðinum þegar til lengri tíma er litið. Er vitað hvaða áhrif samruni Blackboard og WebCT mun hafa á WebCT námsumhverfið? Má vænta grundvallarbreytinga á hugbúnaðinum? Hafa notendur eitthvað um það að segja?
• Hvaða möguleika boðar WebCT hvað varðar þróun í hagnýtingu upplýsingatækninnar í námi og kennslu? Hver er kostnaðurinn við kaup á viðbótareiningum í kerfið, s.s. stafrænum námsmöppum (ePortfolio)? Er það ekki hlutverk Kennaraháskólans að vera í fararbroddi á þessum vettvangi? Getur skólinn sinnt því hlutverki ef dýrkeyptar hugbúnaðarlausnir standa í veginum? Er æskilegt að búa við lausn eða lausnir sem takmarka framþróun á kennsluháttum innan Kennaraháskólans?
• Hvað gerist við sameiningu Kennaraháskólans og Háskóla Íslands? Mun sameinaður skóli nýta WebCT eða Moodle eða jafnvel hvoruga lausnina? Háskóli Íslands nýtir ekki WebCT en hefur nýlega innleitt Moodle. Hvaða hlutverki mun Uglan gegna í framtíðarskipan tölvustudds náms sameinaðs háskóla? Hvað með íslenskar lausnir, þ.e. MySchool og Námskjáinn?

Staðlar og aðgengi

• Hversu aðgengilegt er WebCT nemendum með sértækar þarfir, s.s. sjónskertum eða blindum nemendum? Hefur það verið kannað eða stendur til að kanna aðgengikosti WebCT í ljósi sívaxandi umræðu um mikilvægi staðla og aðgengi allra að upplýsingasamfélaginu?
• Núverandi WebCT útgáfa KHÍ styður ekki við Firefox vefskoðarann, er þetta merki um ósamhæfni við alþjóðlega staðla í vefsmíðum?

Opinn hugbúnaður eða séreignahugbúnaður

• Hefur þeirri spurningu verið velt upp innan Kennaraháskólans hvaða hlutverki opinn hugbúnaður eigi að gegna í skólastarfi? Er opinn hugbúnaður valkostur innan KHÍ þegar ákvarðanir um hugbúnaðarkaup eru annars vegar?

Það er sannfæring mín að sú endurskoðun og uppbygging sem á sér stað innan KHÍ og væntanleg sameining skólans við Háskóla Íslands gefi stjórnendum og starfsmönnum öllum einstakt tækifæri til þess að horfa á opinn og gagnrýnan hátt á hlutverk og notkun upplýsingatækninnar í námi og kennslu við skólann. Það tækifæri verður að grípa. Háskóli Íslands hefur, eins og þekkt er orðið, sett sér það háleita markmið að verða einn af 100 bestu háskólum í heimi. Innan skammst, þ.e. með sameiningu skólanna, mun það einnig verða markmið KHÍ ekki rétt? Kannski við ættum að skoða hvernig þeir háskólar sem nú skipa þann lista eru að nýta tæknina? Hvaða sess skipar hún í þeirra starfi?

Ritin má öll sækja endurgjaldslaust á vef eLearning Guild á pdf sniði. Þau eru sem hér segir:

• 382 Tips on the SELECTION of an LMS or LCMS
• 339 Tips on the IMPLEMENTATION of an LMS or LCMS
• 311 Tips on the MANAGEMENT of an LMS or LCMS

Bækurnar eiga það sameiginlegt að vera vel skipulagðar og aðgengilegar. Einstaka ráðleggingar eru að vísu frekar almennar og jafnvel augljósar en inn á milli má finna marga virkilega áhugaverða punkta og ábendingar sem koma að góðum notum. Vel þess virði að skoða.

Ákvörðun UCLA er áhugaverð einnig í ljósi þess að skólinn er þátttakandi í Sakai verkefninu sem felst í samvinnu nokkurra öflugra háskóla vestanhafs um þróun og smíði öflugs netbundins námsumhverfis. Þess má geta að Sakai er opinn hugbúnaður eins og Moodle. Þrátt fyrir innleiðingu Moodle mun UCLA eftir sem áður taka þátt í þróun Sakai sem virkur meðlimur í Sakai stofnuninni (Sakai foundation).

UCLA er áhrifamikil menntastofnun og almennt talinn einn af betri háskólum í heimi. Í rannsókn Shanghai Jiao Tong háskólans árið 2006 á gæðum háskóla varð UCLA í 14. sæti. Rannsókn Shanghai Jiao Tong er ein hin þekktasta sinnar tegundar og í kjölfar hennar er birtur listi yfir 500 bestu háskóla heims á hverju ári. Val UCLA á Moodle hlýtur því að teljast meiriháttar vegsauki fyrir Moodle námsumhverfið og opinn hugbúnað almennt.

En hvað með íslenska háskóla? Moodle er nú þegar nýtt við kennslu í Hólaskóla og Kennaraháskóla Íslands þó í takmörkuðu mæli sé á þeim bænum. Háskóli Íslands hefur og sett upp Moodle og hyggst bjóða áhugasömum kennurum að nýta það í kennslu. Sjálfur er ég spenntur fyrir þeim möguleika og sé því nákvæmlega ekkert því til fyrirstöðu að sameinaður háskóli HÍ og KHÍ fari að fordæmi UCLA og Opna háskólans í Bretlandi og taki upp Moodle sem aðalnámsumhverfi skólans á Netinu.