Kozzi verkefnið er fjármagnað með sölu auglýsinga á vefnum. Hvort það mun standa undir sér til langframa verður framtíðin að leiða í ljós, en þangað til annað kemur í ljós þurfa netverjar einungis að skrá sig sem notendur á vefnum til að fá aðgang að myndasafninu í heild sinni.

Kozzi myndasafnið stenst ekki samanburð við dýrkeypt myndasöfn á Netinu eins og t.a.m. Gettyimages. Það er hins vegar vel frambærilegt og í raun ótrúlegt að einhver skuli leggja þessa vinnu á sig þegar ágóðavonin er eins óljós eins og raunin hlítur að vera með vefi af þessari tegund. Það læðist reyndar að mér sá lúmski grunur að leikurinn sé til þess gerður að ögra voldugu samkeppnisaðilunum nógu mikil til að þeir sjái sig knúna til að kaupa vefinn með húð og ári. Ég fæ t.a.m. ekki séð að myndirnar á vefnum séu gefnar út samkvæmt opnum höfundarleyfum þrátt fyrir að vera ókeypis.

Það verður bara að koma í ljós hversu lengi Kozzi lifir og vonandi verður það sem lengst. Á meðan svo er geta allir þeir sem ekki hafa efni á dýrkeyptu myndefni Getty images og sambærilegra aðila  sótt sér ágætis myndefni með lítilli fyrirhöfn í Kozzi myndasafnið.

Ég hef bætt Kozzi við safn mitt af myndasöfnum á netinu.

Þegar búin eru til púsluspil á Jigsaw Planet er hægt að velja um 7 stærðir af púsluspilum með 10 til 120 púslum. Einnig er hægt að velja um 8 mismunandi útlit á sjálfum púslunum, þ.e. einstaka bútum. Leikinn má svo gera erfiðari með því að heimila spilurum að snúa púslunum (notið örvatakka á lyklaborðinu til þess). Hér má sjá sýnishorn af stjórnborðinu.

Púsluspilið hér fyrir neðan bjó ég til úr stafrænni ljósmynd sem dóttir mín tók. Ég valdi púsl með 40 bitum sem hægt er að snúa.

Hér er bein slóð að sama púsluspili. Ég komst að því þegar ég bjó þetta púsl til að innsendar myndir mega ekki vera stærr en 3MB. Ekki þarf að búa til sérstakan aðgang þegar púsl er búið til sem þýðir væntanlega að notendur munu ekki hafa yfirlit yfir þau púsluspil sem þeir hafa búið til. Ég hef ekki hugmynd um hversu lengi hvert spil er varðveitt í vefþjónum þjónustuaðila.

Til þess að leita með aðstoð Sprixi er einfaldlega slegið inn leitarorð og niðurstöður birtast. Í sameiningu geta notendur Sprixi aukið gæði þjónustunnar með því að tilgreina hvort myndefni er í samræmi við leitarorð. Hér að ofan var t.a.m. slegið inn leitarorðið Koala og eins og sjá má hitta velflestar niðurstöður beint í mark. Velflestar en ekki allar.

Notendur geta gefið hverri einstakri mynd sem Sprixi finnur einkunn sem gerir niðurstöður leitarvélarinnar smátt og smátt nákvæmari. Þetta er ekki ósvipuð hugsun og Google nýtir í Image Labeler.

Þegar svo hentug mynd er fundin er hægt að vísa í hana á Sprixi eða sækja með eða án upplýsinga um rétthafa og leyfistegund.

Þegar valið er að sækja mynd ásamt upplýsingum um höfund og leyfi birtast þær sem texti (á ensku) neðst á myndinni. Einnig er hægt að sækja HTML kóða til að vísa í myndina af hvaða vefsíðu sem er. Þegar það er gert er myndin sjálf hýst hjá Sprixi.

Sprixi leitarvélin er kjörin í kennslu þar sem nemendur geta notað hana til að leita eftir hentugu myndefni sem heimilt er að nýta í hvers kyns verkefnavinnu án endurgjalds.

Í haust var formlega opnaður Wikivefur FB á slóðinni wiki.dreifnam.is. Wikivefurinn keyrir á Mediawiki kerfinu sem er opinn hugbúnaður, sá sami og er undirliggjandi alfræðiritinu Wikipedia. Kennaraháskóli Íslands hefur einnig sett upp Wikivef sem nýtir Mediawiki.

Innan Fjölbrautaskólans í Breiðholti hefur í nokkur ár verið notast við Moodle sem er netbundið námsumhverfi. Moodle hefur reynst afar mikilvægt verkfæri í námi og kennslu við skólan og um þessar mundir er unnið að mjög áhugaverðu þróunarverkefni sem snýr að notkun netbundinna námsumhverfa í kennslu fatlaðra nemenda á starfsbraut skólans.

Önnur áhugaverð verkfæri opin og frjáls eru t.a.m. WordPress bloggkerfið. Ella Jóna bloggaði nýlega um WordPress í skólastarfi, en WordPress er klárlega ein allra besta blogglausnin á markaðinum í dag. Þess má geta að fréttavefurinn Visir.is nýtir WordPress í blogghluta sínum og hið sama má segja um vefritið Eyjuna. Ég vil einnig benda á Elgg sem ég hef áður fjallað um, en þar er á ferðinni áhugaverð lausn sem t.a.m. Salvör Gissurardóttir hjá KHÍ hefur verið að nýta undanfarin misseri með nemendum. Firefox vefskoðarinn ætti að sjálfsögðu að vera uppsettur í öllum skólum og nemendur hvattir til að nýta hann umfram hinn meingallaða Internet Explorer.

Frjáls og opinn hugbúnaður á ekki einungis erindi í grunn, framhalds og háskóla. Ég mæli með því að þið lesið þennan áhugaverða pistil sem hún Fjóla Þorvaldsdóttir skrifar á vef sínum um opnar lausnir í leikskólastarfi. Ég sakna hins vegar öflugri stuðnings frá opinberum aðilum og stofnunum. Menntamálaráðuneytið mætti koma mun sterkar að þessum málum svo ekki sé talað um Námsgagnastofnun sem virðist nánast fullkomlega áhugalaus eða ómeðvituð um frjálsan og opinn hugbúnað í skólastarfi. Þarna er mikið verk óunnið.

Að lokum vil ég vekja athygli á Ísfoss, félagi áhugafólks um opinn hugbúnað í skólastarfi, sem stofnað var þann 16. september á síðasta ári. Því miður hefur lítið farið fyrir félaginu frá stofnun þess, en vonandi verður úr því bætt.

Það sem veldur mér helst áhyggjum hvað svona þjónustur varðar er að ég er ekki fullkomlega viss um að geta treyst þeim fyrir mikilvægu efni, eins og t.a.m. kennslugögnum. Tökum Scribd sem dæmi. Hvaða viðskiptahugmynd liggur svona vef til grundvallar? Ég kem ekki auga á neinar auglýsingar sem hugsanlega gætu aflað vefnum tekna. Maður hlítur því að spyrja sig hversu lengi lítil, kannski nýstofnuð fyrirtæki geta haldið úti ókeypis þjónustu sem grundvallast á mikilli bandvídd og miklu geymslumagni? Allt kostar þetta jú peninga. Get ég sem notandi átt von á því að einn góðanveðurdag þá vakni ég upp við að þjónustunni hefur verið lokað og allt mitt efni óaðgengilegt, glatað? Ég hef líka nokkrar áhyggjur af höfundarréttarmálum á Scribd. Svona við fyrstu sýn virðist ansi mikið af efni vefsins sent inn í óþökk höfundarrétthafa, s.s. heilu bækurnar um vefsmíðar, forritun eða myndvinnslu.

Annars verður bara að koma í ljós hvernig Scribd mun standa sig og þróast. Ég er spenntur fyrir þessari hugmynd og mun örugglega nýta mér Scribd í náinni framtíð. Vonandi erum við að sjá þarna vísi að öflugri þjónustu á Netinu. Það er aldrei að vita.

• Paint.net er hefðbundið myndvinnsluforrit sem inniheldur flestar algengustu skipanir sem finna má í Photoshop, einum þeim öflugasta myndvinnsluhugbúnað sem skapaður hefur verið.
• Artweaver nálgast viðfangsefnið hins vegar frá öðrum sjónarhóli og inniheldur verkfæri sem herma eftir algengum tólum og tækjum listamanna.
  Paint.net og Artweaver eiga það hins vegar sameiginlegt að bæði eru þau ókeypis.

Sjálfsagt er að brýna fyrir öllum tölvunotendum að varast allar slíkar sendingar á MSN og öðrum samskiptavettvöngum Netsins eins og þeirri sem lýst var hér að ofan. Sérstaklega þegar sendandinn er óþekktur en einnig þegar vitað er hvaðan skilaboðin koma.

Mikilvægi öflugra varna gegn vírusum verður heldur ekki ofmetið. Í því sambandi langar mig að benda á fróðlega könnun sem varð á vegi mínum nýlega þar sem viðfangsefnið var einmitt vírusvarnir. Nú eru kannanir sem þessar ekki óalgengar og eðlilegt að taka niðurstöðum þeirra með gát.

Könnunin sem hér um ræðir var framkvæmd á vegum Virus.gr sem sérhæfir sig í rannsóknum og upplýsingagjöf á vettvangi vírusvarna. Samkvæmt könnun Virus.gr eru eftirfarandi þrjár hugbúnaðarlausnir öflugastar þegar kemur að vírusvörnum:

• Kaspergy
• Active Virus Shield
• F-Secure

Athugið að listinn telur alls 58 lausnir og er vel þess virði að skoða hann í heild sinni. Það skal einnig endurtekið að kannanir sem þessar ber að taka með þeim fyrirvara að ólíkar rannsóknaraðferðir skila ólíkum niðurstöðum. Skoðið aðra samskonar lista á Netinu og þið munið sjá allt aðrar niðurstöður. Þeirri spurningu verður því væntanlega seint svarað hvaða vírusvarnarforrit er best allra.

Engu að síður er könnunin allrar athygli verð og ekki síst fyrir þær sakir að á listanum má finna þrjár ókeypis vírusvarnir sem allar standast ágætlega samanburð við dýrkeyptari hugbúnað. Það ætti því að vera óhætt að mæla með eftirfarandi hugbúnaði og kynna fyrir nemendum sem oft hafa takmörkuð fjárráð þegar kemur að hugbúnaðarkaupum:

• Active Virus Shield
• avast! 4 Home Edition
• BitDefender 8

Google Notebook er ekki frumleg hugmynd enda margar álíka hugbúnaðarlausnir litið dagsins ljós. Sjálfur hef ég nýtt eina slíka, sem nefnist Onfolio, með góðum árangri, þ.e. allt þangað til það var selt Microsoft sem gerði hugbúnaðinn hluta af Microsoft Live veflausninni sem óðum er að taka mynd. Onfolio er þegar til í beta útgáfu sem hluti af Microsoft Live toolbar tækjastikunni. Ég hef notað þessa tækjastiku með Internet Explorer undanfarnar vikur, en finnst hún frekar óspennandi. Ég er þar að auki Firefox notandi og kann illa við þá aðferð Microsoft að gefa út hugbúnaðarlausnir sem útiloka samkeppnisaðila, sem því miður vill brenna við.

Ég geri því fastlega ráð fyrir að kynna mér vel Google Notebook á komandi dögum og fyrsta sýn lofar bara góðu. Þessi vefbundna glósubók er afar einföld í notkun og notendaviðmótið er mjög í anda annarra þjónusta frá Google. Til þess að nýta Google Notebook er fyrst sótt lítil viðbót (plugin), sem eins og staðan í dag er fáanleg fyrir Internet Explorer og Firefox. Þegar viðbótin hefur verið sett upp birtist hnappurinn “Open Notebook” neðst í hægra horni vefskoðarans og má nota hann til þess að opna glósubókina eða bæta við glósum. Notendur geta einnig stytt sér leið með því að skyggja þann texta eða mynd (eða bæði) sem ætlunin er að glósa og velja “Note this” valkost af hægri valseðlinum sem þá birtist. Glósurnar í Google Notebook eru aðgengilegar á Netinu og geta notendur valið hvort glósubækurnar tilheyra þeim einum eða hvort þeir vilja opna þær öðrum notendum. Þannig má hugsa sér að hópur sem er að vinna saman að ákveðnu verkefni geti deilt með sér glósubók með aðstoð Google Notebook.

Einfalt er að sýsla með glósur eftir að þær hafa verið færðar í kerfið. Hægt er að vinna með texta þeirra og raða þeim á hvern hátt sem hentar með því einu að draga til. Þá er hægt að búa til fyrirsagnir í glósusafnið og þannig kaflaskipta glósunum sem það hefur að geyma. Einfalt er að leita í glósusafninu. Hver notandi getur búið til fleiri en eitt glósusafn sem einnig er öflugur kostur, t.a.m. þegar unnið er með fleiri en eitt verkefni.

Google Notebook hefur hlotið blendnar viðtöku Netverja og benda margir á að svipaðar lausnir hafi lengi verið til og Notebook hafi lítið sem ekkert umfram þær að bjóða. Auk þess benda margir á að ekki sé hægt að merkja eða tagga einstaka færslur í Notebook eins og svo algengt er orðið á Netinu og er það vissulega stór galli. Á hinn bóginn má benda á að um beta útgáfu er að ræða þannig að við eigum örugglega eftir sjá uppfærslur og spennandi nýjungar í náinni framtíð.

Ég mæli með því að þið kynnið ykkur þessa sniðugu lausn. Hún er vel þess virði og er skemmtileg og gagnleg viðbót við ört vaxandi flóru ókeypis forrita og þjónusta sem nýta má í skólastarfi.

Technorati Tags: Google notebook

Ég hef átt viðskipti við íslenska myndabankann NordicPhotos og get hiklaust mælt með honum enda bæði myndirnar og þjónustan góð. Því er hinsvegar ekki að neita að margir myndabankar eru ansi dýrkeyptir og því hef ég freistast til þess að leita annarra leiða og reyndar með nokkuð góðum árangri.

Síðustu mánuði hef ég mikið notast við iStockphoto myndabankann sem er einskonar samfélag ljósmynda þar sem þeir geta sent inn myndir og selt á vefnum ef gæði þeirra standast kröfur stjórnenda. Á iStockphoto er stórt úrval af vönduðum (og ekki svo vönduðum) myndum á afar hagstæðu verði, eða frá 1$ – 10$ fyrir mjög stóra mynd. Ég er venjulega að borga 3$ fyrir mynd í góðum prentgæðum sem verður að teljast einstaklega hagstætt verð þegar um góða ljósmynd er að ræða. iStockphoto vefurinn er faglega unninn og býr yfir öllum helstu eiginleikum hefðbundinna myndabanka, s.s. góðri leitarvél, ljósaborðum (lightboxes) og forskoðun mynda. Ég mæli því hiklaust með iStockphoto fyrir alla þá sem eru á höttunum eftir góðum en ódýrum ljósmyndum eða hvers kyns teikningum að nota í kynningar eða kennsluefni.

Nýlega opnaði annar álíka vefsamfélag ljósmyndara sem selja verk sín á hagstæðu verðu og nefnist hann Fotolia. Ég er þessa dagana að prufa Fotolia og er óhætt að segja að hann lofar góðu. Verð mynda á Fotolia er sambærilegt við iStockphoto og úrvalið þar er einnig mikið. Fotolia vefurinn virðist faglega unninn við fyrstu sýn og er þægilegur í notkun.

Það verður að segjast eins og er að ókeypis ljósmyndir eru öllu erfiðari viðureignar, þ.e. þegar farið er eftir leikreglum um höfundarétt og leyfisskilmála sem auðvitað allir eiga að gera. Þegar ég hef leitað eftir myndum sem ég get notað án endurgjalds í eigin verkum hef ég nýtt mér Yotophoto leitarvélina. Yotophoto leitar í myndasöfnum sem hafa að geyma myndir sem leyfilegt er að nota án endurgjalds og sparar manni þannig tíma við að leita á hverjum einstaka myndabanka fyrir sig. Að vísu verða notendur að gera sér grein fyrir því að um fjölbreyttar leyfistegundir getur verið að ræða, en í meginatriðum er um að ræða ókeypis myndir. Í einstaka tilfellum þarf viðkomandi einnig að skrá sig inn á þann myndabanka sem hefur að geyma þá mynd se ætlunin er að sækja. Önnur viðlíka leitarvél nefnist Everystockphoto. Ég hef takmarkaða reynslu af Everystockphoto en sýnist hún vera frekar svipuð og Yotophoto en þó ekki eins mikil að gæðum. Almennt má segja um ókeypis myndirnar að þær eru mun takmarkaðri að gæðum en þær sem borgað er fyrir auk þess sem úrvalið er mun minna. Látið það samt ekki hindra ykkur í að leita eftir ókeypis myndum á Netinu með aðstoð Yotophoto eða Everystockphoto. Munið bara að í myndaleit á Netinu sem og öðrum mannanna verkum þá er þolinmæði dyggð.

Sketchup kom fyrst á markaðinn árið 2001 og hefur frá þeim tíma vaxið að mjög að vinsældum enda bæði öflugt og einfalt í notkun. Ekki spillti verðið fyrir vinsældunum því Sketchup hefur frá upphafi verið tiltölulega ódýr hugbúnaður miðað við sambærileg forrit. Ástæða þess að Sketchup nú er hægt að sækja án endurgjalds á Netið er sú, að fyrir stuttu síðan keypti Google fyrirtækið framleiðendur Sketchup með húð og hári og hefur nú tekið þetta skref til að gera hugbúnaðinn enn aðgengilegri en áður. Það skal strax tekið fram að ókeypis útgáfa Sketchup er nokkuð skert, þ.e. hún inniheldur ekki alla möguleika Sketchup 5, sem er nýjasta útgáfa hugbúnaðarins og fáanleg gegn endurgjaldi. Sá er gallinn helstur á gjöf Njarðar að með ókeypis útgáfunni eru einstaka teiknimöguleika ekki til staðar auk þess sem ekki er hægt að vista myndir í sérstökum þrívíddarsniðum eða sem stutt myndskeið. Hitt er annað mál að Sketchup er kjörið verkfæri fyrir kennara og nemendur sem hafa áhuga á því að kynna sér sérlega spennandi heim þrívíddarteikninga á einfaldan og fljótlegan hátt.

Ef ég ætti að velja tvö orð til þess að lýsa Sketchup yrðu orðin einfalt og fljótlegt örugglega fyrir valinu. Sketchup er ótrúlega einfalt í notkun og það er einmitt þessi einfaldleiki sem gerir það svo aðlaðandi valkost í skólastarfi í grunnskóla jafnt sem á framhaldsskólastiginu. Nemendur geta unnið með teikningar í þrívídd á frumlegan og skapandi hátt og það er enginn skortur á verkefnum sem hægt er að vinna með aðstoð svona hugbúnaðar. En Sketchpad er ekki aðeins einfalt í notkun heldur er hér um að ræða afar öflugan hugbúnað sem nýttur er af arkitektum jafnt sem leikjahönnuðum og fjölmörgum öðrum sem vinna með þrívíddarteikningar. Rétt er samt að geta þess að Sketchpad er ekki ætlað að koma í staðinn fyrir þrívíddar teikniforrit eins og 3D Max, Autocad eða Maya til þess er hann ekki nógu öflugur ennþá.

Í stuttu máli sagt þá er Sketchup er eitt af þessum frábæru verkfærum sem eru í senn öflug og svo einstaklega skemmtileg í notkun að það er bókstaflega erfitt að slíta sig frá þeim. Og það er meira til. Innifalið í Sketchup er aðgengi að vöruhúsi teikninga, eins og það er kallað, eftir aðra Sketchup notendur þar sem finna má allt frá hundakofum upp í stórfenglegustu hallir. Þannig er, með einum músarsmelli, hægt að sækja teikningar annarra og nýta í eigin verkum eða þá senda eigin verk í safnið og gera aðgenglegt öðrum. Síðast en ekki síst er ákaflega einfalt að tengja saman Sketchup og Google Earth og staðsetja sköpunarverk sín hvar sem er í heiminum. Þetta er frábær möguleiki sem gaman er að leika sér með og getur einnig komið að góðum notum í kennslustofunni.

Landslagsarkitektúr		Arkitektúr
Sketchup notað við garðhönnun		Svona lítur nýja húsið út
Heildarmynd		Meiri arkitektúr
Þetta er magnað		Viðbygging við skóla

Ég er sannfærður um að þetta nýjasta útspil Google á eftir að vekja mikla athygli og það verður gaman að fylgjast með því hvernig kennarar koma til með að nota þennan spennandi hugbúnað, hér á landi sem og annarsstaðar.

Joomla

Joomla er opinn hugbúnaður, mjög vinsæll og í mikilli notkun víðsvegar um heiminn. Hérlendis má finna ótilgreindan fjölda vefa stórra og smárra sem nýta Joomla vefumsjónarkerfið með góðum árangri. Hér að neðan má sjá nokkra þeirra.

• Félag íslenskra söngkennara
• Efnafræðifélag Íslands
• Reiknistofnun Háskóla Íslands
• Nemendafélag Fjölbrautaskóla Suðurnesja
• Haxi – hagsmunafélag líffræðinema
• Lögreglufélag Reykjavíkur
• Alrun skrifstofuvörur
• Njarðvíkurskóli

Joomla á rætur sínar að rekja til sambærilegs vefumsjónarkerfis sem heiti Mambo, en fyrir nokkru síðan urðu deilur milli forritara og rétthafa Mambo vörumerkisins til þess að hinir fyrrgreindu ákváðu að halda þróun kerfisins áfram á eigin vegum. Joomla er því skilgetið afsprengi Mambo og í dag er meira líkt með kerfunum en ólíkt. Væntanlega munu þau þó þróast hvort í sína áttina með tíð og tíma.

Joomla er hannað með það í huga að vera einfalt í uppsetningu, jafnvel í höndum notenda sem búa yfir lítilli sem engari reynslu af forritun eða umsýslu stýrikerfa. Flestir eiga í litlum vandræðum með að sækja Joomla og setja upp á eigin vefþjón eða vefþjónum sem þeir hafa aðgang að. Eina sem þarf til að setja upp kerfið er ftp aðgangur að vefsvæði með php stuðningi og aðgangur að mysql gagnagrunni. Og þeir sem eiga í vandræðum með uppsetninguna geta hæglega leitað sér aðstoðar hjá yfir 26.000 skráðum notendum sem margir hverjir halda til á umræðuvefjum joomla.org, opinbers vefs Joomla.

Að uppsetningu lokinni er kerfið tilbúið til notkunnar og einfalt að bæta við nýjum vefsíðum, fréttum, texta og myndum. Notendur hafa fullkomið vald yfir öllum efnisþáttum vefsins og geta sniðið útlit hans og virkni að eigin þörfum. Kjósi fólk að sækja sér sérhannað sniðmát eru margar leiðir færar. Öll umsýsla í joomla fer fram í gegnum vefskoðara.

Joomla er afar einfalt í notkun fyrir hinn almenna notanda en býður um leið upp á mjög öfluga kosti fyrir þá sem vilja meira og kjósa að aðlaga kerfið að sértækum þörfum eða aðstæðum. Joomla grundvallast á sjálfstæðum einingum sem einfalt er að bæta við staðlaða uppsetningu og auka þannig möguleika kerfisins til muna. Hundruð slíkra viðbóta er hægt að sækja án endurgjalds á vefinn og má hér að neðan sjá örlítið sýnishorn af því sem í boði er.

• Flokkuð vefsöfn
• Skjalasöfn
• Myndasöfn
• Vefverslun
• Umræðuvefi
• Dagatöl og viðburðaskráningu
• Blogg
• Netbundin fréttabréf og póstlista
• Gagnasöfnun og verkfæri til skýrslugerða
• Auglýsingaborða og verkfæri til birtingu auglýsinga
• og margt, margt fleira

Allar frekari upplýsingar um Joomla vefumsjónarkerfið eru aðgengilegar á vefnum www.joomla.org og þar er einnig hægt að sækja nýjustu útgáfu kerfisins hverju sinni auk fjölda viðbótareininga. Sjálfsagt er að senda tölvupóst á S.Fjalar, umsjónarmann þessa vefs, ef frekari upplýsinga, ráðgjafar eða aðstoðar við uppsetningu og innleiðingu Joomla í skólaumhverfi er á dagskránni.

Hugbúnaðurinn inniheldur auk þessa aðgerðir sem notendur öflugri myndvinnsluforrita eiga að venjast eins og t.a.m. valverkfæri, gegnsæi og lagskipta myndinnslu. Artweaver býr yfir dágóðu safni myndsía (filters) og getur unnið með öll helstu skráarsnið sem tíðkast í myndvinnslu (bmp, gif, jpeg, pcs, tga, tiff og png). Artweaver styður við hefðbundin tölvutengd teikniborð og hægt er að sækja viðbætur (plugins) sem þó verða að vera sérhannaðar fyrir hugbúnaðinn.

Artweaver er hugbúnaður í mikilli þróun. Þegar þetta er skrifað er nýjasta útgáfan 0.3.9.9. Ekkert er samt að óttast því Artweaver þessi útgáfa er mjög stöðug og óhætt að setja hana upp og nota.

Artweaver má sækja án endurgjalds og því heppilegt að nýta í skólastarfi. Í fyrsta lagi vegna þess að um mjög skemmtilegt teikniforrit er að ræða sem kemur að góðum notum í t.d. listgreinakennslu og öðru skapandi starfi. Í öðru lagi vegna þess að Artweaver er ókeypis og því fjárhagslega hagkvæmur kostur fyrir skóla og ekki síst nemendurna sjálfa sem geta sótt það án mikillar fyrirhafnar og sett upp á tölvunni heima hjá sér. Það er nefnilega allt of algengt að foreldrar og nemendur hafi ekki aðgang á heimilinu að þeim hugbúnaði sem unnið er með í skólanum. Það er allt of mikið bil á milli tölvunotkunar í skólakerfinu og á heimilum og ef til vill er ókeypis eða opinn hugbúnaður ein leið til þess að brúa það.

Technorati Tags: artweaver