Hægt er að skrá fjölbreyttar upplýsingar á hvert atriði/verkþátt og halda utan um framvinduna. Einnig er hægt að gera ákveðna notendur, einn eða fleiri, ábyrga fyrir einstaka verkþáttum. Trello hentar þannig einstaklega vel til verkefnastjórnunar í smáum og meðalstórum teymum þar sem skipulag og samvinna er mikilvæg. Hægt er að hengja skjöl við einstaka verkþætti.

Einn helsti kosturinn við Trello er hvað það er einfalt í notkun. Umhverfið er mjög myndrænt og gagnvirkt og allar uppfærslur eru í rauntíma. Innleiðing á verkfærinu Trello sem slíku ætti því að vera nokkuð þægileg, en hafa verður í huga að Trello er einungis tæki sem styður við ákveðna hugmyndafræði og ákveðið verklag í verkefnastjórnun, s.s. Kanban. Og innleiðingin á því er annað mál og meira.

Enn sem komið er má nýta Trello endurgjaldslaust. Ekki er alveg á hreinu hvaða fyrirkomulag eða verðlag verður á þjónustunni í framtíðinni.

Trellu er einnig til sem tól fyrir iPhone, iPod touch og iPad.

Wallwisher hefur notið töluverðrar athygli að undanförnu, ekki síst meðal kennara sem margir hverjir hafa lofað þjónustuna mjög. Hér er t.a.m. pistill frá Sean Banville nokkrum sem á í handraðanum 105 hugmyndir að notum Wallwisher í kennslu. Og hér er svo korkur þar sem sem fjallar einmitt um not sem hafa má af Wallwisher í kennslu.

Ég ákvað því að láta slag standa og prufaði Wallwisher með nemendum mínum í enskutíma. Ég bjó til eigin kork og setti á hann nýjasta framlag okkar Íslendinga til Eurovision söngvakeppninngar, eitthvað sem nemendum mínum þykir mjög áhugavert viðfangsefni. Að því loknu sendi ég þeim slóðina að korknum í tölvupósti og bað alla að skrá athugasemdir við framlagið á ensku. Korkurinn var birtur öllum bekknum með aðstoð skjávarpa.

Til að gera langa sögu stutta  komst ég fljótlega að því að þjónustan hefur bæði spennandi kosti og augljósa galla sem verkfæri í námi eða kennslu. Líklegast hentar hún illa til þeirra verka sem ég ætlaði henni með nemendum mínum þar sem uppfærslur eru ekki í rauntíma og letrið of smátt til að nota á skjávarpa fyrir framan bekk og ekki hægt að stækka það. Það væri forvitnilegt að heyra frá fleirum sem hafa nýtt Wallwisher í kennslu.

Kostir

• Líkt og Sean Banville bendir á þá eru ótal skemmtilegar leiðir til að nýta Wallwisher með nemendum.
• Wallwisher er ókeypis.
• Hægt er að takmarka aðgang að þjónustunni eða hafa einstaka borð opið öllum.
• Nemendur eru enga stund að átta sig á því hvernig Wallwisher virkar.

Gallar

• Allt of mikið álag á þjónustunni gerir hana hrikalega hægvirka á köflum og á stundum dettur hún alveg niður.
• Wallwisher hentar illa með skjávarpa og gagnvirkri töflu þar sem ekki er hægt að stækka letrið sem verður þá illæsilegt úr fjarlægð.
• Wallwisher er ekki rauntímaþjónusta, þ.e. til þess að birta færslur frá öðrum þarf að endurhlaða síðunni.

Reynsla mín af Wallwisher er bæði góð og slæm og ég veit ekki alveg hvað ég á að halda. Möguleikarnir eru vissulega fyrir hendi en það vantar eitthvað upp á til að gera mig sáttan. Nú má sjálfsagt segja hið sama um velflesta nýliða á netinu og auðvitað er ekkert óvenjulegt við að opinbera hugbúnað sem enn er í þróun. Nóg eru til dæmin um slíkt. Hins vegar finnst mér ganga heldur hægt að þróa Wallwisher og það læðist að mér slæmur grunur um að eitthvað sé ekki eins og það á að vera þegar ég tek eftir því að bloggið þeirra hefur ekki verið uppfært í rúmlega ár. En fari allt á versta veg hjá Wallwisher þá hafa sambærilegir vefir sprottið upp eins og gorkúlur.

Aðrir svipaðir valkostir

• Corkboard me
• Lino.is
• Edistorm
• Stixy
• Spaaze

Ning hefur ekki síst verið vinsælt meðal kennara um heim allan sem hafa notað frelsið og verkfærin sem það hefur í boði til að skapa fjölbreytt samfélög um nám, samskipti og samvinnu. Ég er meðlimur í nokkrum slíkum samfélögum. s.s.:

• Assistivetech
• Classroom 2.0
• College 2.0
• Edubloggerworld
• Games in School
• LearningTown
• TLWMSN
• Upplýsingatækni í miðlun og menntun

Hinn 15. apríl s.l. kom hins vegar tilkynning frá stjórnendum Ning að öllum ókeypis samfélögum á þeirra vegum yrði lokar. Eigendur hafa því um þrjá kosti að velja. Loka sjoppunni fyrir fullt og allt, flytja efnið sitt og byrja annarsstaðar eða greiða fyrir áframhaldandi aðgang að Ning. Þess má geta að þann 4. maí nk. ætlar Ning að birta upplýsinagr um framtíðarfyrirkomulag á þjónustunni, verð og annað.

Tilkynningin frá Ning þarf ekki að koma svo mikið á óvart. Sögur um fjárhagslega erfiðleika fyrirtækisins hafa verið á sveimi og þar sem stjórnendur Ning hafa tilkynnt um uppsögn 40% starfsmanna samhliða lokun á ókeypis þjónustu er ekki erfitt að geta sér til um ástæðuna.

Sumir hafa gengið svo langt að túlka aðgerðirnar hjá Ning sem upphafið að endalokum Freemium módelsins svokallaða. Það er alls ekki svo langsótt hugmynd og hver veit? Sjálfur tel ég svo ekki vera. Það munu alltaf vera til aðilar sem sjá hag sinn í því að veita takmarkaða grunnþjónustu ókeypis en krefjast greiðslu fyrir allt umfram það. Ég held auk þess þess háttar tekjumódel henti ágætlega á einstaka sviðum hvað sem segja má um núverandi erfiðleika Ning. Eins og réttilega segir í þessari grein þá virðist galdurinn felast í því að ná allt að því fullkomnu jafnvægi á milli þess sem þú gefur frá þér og þess sem þú ætlar notendum að greiða fyrir. Ókeypis þjónustan verður að hafa mikið aðdráttarafl en hún má alls ekki uppfylla þarfir allar þarfir viðskiptavinsins því þá er engin ástæða að uppfæra í greidda þjónustu. Í þessu ljósi má segja að ókeypis þjónustan hjá Ning hafi einfaldlega verið of góð til að endast.

Sólveig Jakobsdóttir kennari við HÍ sem stýrir Ning samfélagi um Upplýsingatækni í miðlun og menntun verður því, ásamt öðrum notendum að ókeypis þjónustunni, að gera upp hug sinn. Er Ning peninganna virði? Henni og öðrum sem standa í sömu sporum má benda nokkra valkosti. Facebook kemur strax upp í hugann en persónulega finnst mér það ekki ákjósanlegur valkostur fyrir menntasamfélög. Netverjar hafa verið duglegir að benda á önnur verkfæri (eða hér) fyrir Ning notendur og mætti s.s. íhuga þann kost líka. Svo mætti auðvitað fara allt aðra leið og setja upp samþættan vef í kringum blogg og wiki kerfi. Ég legg hinsvegar til að þið sem standið í þessum sporum skoði vandlega opna hugbúnaðinn BuddyPress. Buddypress byggir á hinu geysivinsæla vefkerfi WordPress nema hvað það hefur verið mótað sérstaklega til að þjóna hlutverki tengslanets.

p.s

Ning er ekki eina þjónustan þar sem ákveðið hefur verið að loka á ókeypis aðgang. Hið sama má segja um Visible Body, stórfenglegan vef sem lengi vel var ókeypis en er það ekki lengur því miður. Kynnið ykkur samt nemenda- og kennarakjörin þeirra því auðvitað er meira en sjálfsagt að greiða sanngjarnt verð fyrir góða þjónustu.

Til þess að stofna eigin umræðuvettvang er smellt á [Create Room] hnappinn og slóð að YouTube myndskeiðinu sem ætlunin er að horfa á límd í reitinn neðst í hægra horni. Þar fyrir opan er valið hvort spjallvettvangurinn eigi að vera lokaður (e. private) eða opinn almenningi. Hver sem er getur tekið þátt í umræðu sem er opin.

Til þess að bjóða öðrum að horfa á myndskeiðið og taka þátt í spjallinu er slóðin að vettvangnum afrituð (sjá efst í hægra horni) og send til þeirra sem taka eiga þátt.

Sá sem stofnar umræðuvettvang ræður hvaða myndkskeið er þar til sýningar og getur skipt um myndskeið að vild. Stofnandi umræðu getur einnig stoppað spilun á viðkomandi myndskeiði hvenær sem er og hefur sú aðgerð þau áhrif að myndskeið þátttakenda stoppa einnig á sama stað. Tekið skal fram að Synchtube er ennþá í betaútgáfu og væntanlega verður fleiri eiginleikum bætt við þjónustuna í náinni framtíð. Ég saknaði þess t.d. að geta ekki varpað umræðu yfir á eigin vef. Það gæti t.d. verið kostur að varpa umræðu um myndskeið inn í námsstjórnunarkerfi.

Annars er notkun á myndskeiðum af Netinu er engin nýbreytni í skólastarfi en vissulega eykst notagildi þeirra til muna þegar hægt er að stofna til rauntíma umræðu samhliða myndskeiðinu. Auðvitað þarf sú umræða ekki að vera tilkomin með þjónustu á við Synchtube. Þannig mætti vel hugsa sér að nota Skype eða annan sambærilegan hugbúnað.

Svo má einnig benda á að Synchtube er alls ekki eina þjónustan sem samþættir YouTube og rauntímaspjall. Á tilraunastofu YouTube (Testtube) er m.a. fengist við þróun á sambærilegum vettvangi sem nefnist Streams.

Ég hef örlítið fiktað í YouTube Streams þjónustunni. Hún býður upp á svipaða virkni og Synchtube en fleiri valkostir. Fleiri valkostir hafa reyndar í för með sér aukið flækjustig þannig að ég ætla ekkert að fullyrða um hvor þjónustan er betri. Ég er reyndar mun spenntari fyrir YouTube Realtime sem fáir útvaldir hafa þegar fengið aðgang að. Ég er því miður ekki í þeirra hópi. Ef einhver er svo heppinn að eiga boðsmiða má viðkomandi hafa mig í huga.

Eins og fram hefur komið líkar mér mjög vel við Sliderocket og held því staðfastlega fram að þarna sé loksins komin á sjónarsviðið öflug þjónusta sem nýti kosti og eiginleika netsins á þann hátt að vel geti ógnað markaðsstöðu hefðbundinna lausna á sama vettvangi. Á ég þá auðvitað helst við Microsoft Powerpoint.

Sérstaklega er ég spenntur fyrir samvinnukostunum í Sliderocket en öflug samvinna er sá virðisauki sem netlægur hugbúnaður hefur haft umfram hefðbundinn. Aðrir kostir við Sliderocket er einföld miðlun efnis í gegnum Netið.

Mér hugnast hins vegar lítið verðskrá Sliderocket og hvernig pakkarnir eru samansettir. Þannig er ókeypis útgáfan t.d. gersneydd öllum þeim kostum sem gera netlægar lausnir aðlaðandi, s.s samvinnukostina og hið sama má segja um einstaklingsútgáfuna. Þar að auki finnst mér of dýrkeypt að borga 10$ á mánuði fyrir takmarkaða einstaklingsútgáfu svo ekki sé talað um 20$ á mánuði fyrir viðskiptaútgáfuna, sem er einmitt sú útgáfa er hentar skólum best. Reikni hver fyrir sig kostnaðinn fyrir meðalstóran skóla.

Ég veit ekki hvaða afslátt Sliderocket gefur skólum eða öðrum stórnotendum, en til þess að öðlast alvöru markaðshlutdeild verða fyrirtæki sem ætla sér að keppa í einhverri alvöru við rótfastar lausnir að bjóða upp á mun hagstæðari kjör en hér er gert. Ég tala nú ekki um þegar helsti keppinauturinn hefur tilkynnt að hann hugi á eigin netlausnir.

Ég mun örugglega halda áfram að fylgjast með þróun Sliderocket og nýta ókeypis þjónustuna eftir þörfum. Ég er alveg tilbúinn til þess að greiða sanngjarnt verð fyrir svo frambærilega lausn, en ég fæ engan veginn séð hvernig skólar eiga að geta reitt fram 20$ mánaðarlega fyrir hvern notanda hversu aðlaðandi sem hugbúnaðurinn kann að vera.

Þannig er það bara.

Skýrslurnar eru eftirfarandi:

• Report 1
  The current landscape – opportunities, challenges and tensions (May 2008)
• Report 2
  Learners’ use of Web 2.0 technologies in and out of school in Key Stages 3 and 4 (June 2008)-
• Report 3
  Implementing Web 2.0 in Secondary Schools: Impacts, barriers and issues (September 2008)
• Report 4
  E-safety issues in using Web 2.0 (September 2008)
• Report 5
  Web 2.0 technologies for learning at Key Stage 3 and 4: summary report (September 2008)

Ég hvet áhugafólk um upplýsingatækni í skólastarfi að kynna sér innihald þessara skýrslna. Fyrir rannsakendur og fræðimenn á þessum vettvangi eru þær kærkomnar heimildir sem nýtast ekki síður okkur Íslendingum en Bretum við innleiðingu á nýrri tækni í skólakerfið.

Ég mæli einnig með ágætu yfirliti Hjartar Smárasonar um Web 2.0.

Zoomorama er netbundin þjónusta og ókeypis enn sem komið er allavega. Til þess að birta efni á Zoomorama þarf hins vegar að sækja og setja upp sérstakan hugbúnað, en hann er aðgengilegur og einfaldur í notkun.

Zoomorama byggir á Mozilla vafranum og keyrir á Windows stýrikerfum. Macintosh útgáfa er í vinnslu.

Notendaviðmót Sketchcast er mjög þægilegt enda valkostirnir ekki svo margir. Hægt er að draga línur í nokkrum litum og skrifa texta. Einnig er hægt að velja hvort hljóð er tekið upp samhliða teikningunni eða ekki.

Notendaviðmót Sketchpad

Vankantar þjónustunnar eru hins vegar ýmislegir. Í fyrsta lagi er erfitt að teikna svo eitthvað vit sé að með mús. Ég er kannski ekki besta dæmið samanber teikninguna eftir mig hér að neðan, en þar til gert skrifborð er nauðsynlegt að mínu mati ef vel á að vera. Í öðru lagi þá er ekki mögulegt að nota séríslenska bókstafi í nöfnum teikninga. Ég hef sent fyrirspurn vegna þessa og vonandi verður fljótlega bætt úr því.

Sketchcast er opið öllum án endurgjalds og eina sem til þarf er að stofna aðgang og byrja að teikna. Teikningar eru birtar á vefjum með því að sækja kóða sem fylgir hverri teikningu, líkt og myndskeiðunum á uTube eða glærunum á Slideshare.

Eins og sjá má á meðfylgjandi sýnishornum eru Simile tímalínurnar gagnvirkar og möguleikar þeirra í kennslu eru óneitanlega spennandi. Þegar kemur að smíði þeirra er hugbúnaðurinn hins vegar vegar ekkert sérstaklega notendavænn og krefst nokkurrar þekkingar á vefsíðugerð og XML. Ágætar leiðbeiningar um notkun má þó finna á vef Simile þannig að áhugasamir vefarar ættu hiklaust að láta slag standa. Þeir sem vilja eitthvað aðgengilegra og einfaldar í notkun ættu að kynna sér xTimeline.

xTimeline

xTimeline er all í senn netbundið verkfæri til að setja saman og birta gagnvirkar tímalínur og samfélag notenda sem deila verkum sínum ekki ósvipað og tíðkast meðal notenda YouTube. xTimeline er mun einfaldara í notkun en Simile hugbúnaðurinn fyrrnefndur og býr auk þess yfir kostum sem gera þessa ókeypis þjónustu sérlega áhugaverða í augum kennara. Líkt og myndskeið á YouTube er hægt að varpa tímalínum yfir á hvaða vef sem er, en það sem helst vekur áhuga minn er sá kostur að geta heimilað öðrum notendum að vinna með tímalínur sem ég hef skapað. Hér er á ferðinni ósvikin web 2.0 hugmyndafræði þar sem netbundinn hugbúnaðurinn er eins og umgjörð utan um samfélag notenda sem skapar innihaldið og miðlar sín á milli. Ekki sakar að tímalínurnar geta falið í sér myndir, myndskeið, tónlist og krækjur í aðra vefi. Í kennslu býður þessi kostur upp á fjölmarga möguleika á nýrri nálgun viðfangsefnisins og aukinni þátttöku og samvinnu nemenda. Kennarar geta t.a.m. stofnað tímalínur en látið nemendur um að fylla þær efni og þannig í sameiningu kortlagt sögulega viðburði, skáldsögur, líf einstakra manna eða hugmynda.

Hér fyrir neðan má sjá hvernig litríku lífi William Shakespeare er endurspeglað á xTimeline tímalínu. Athugið að hægt er að stilla stærðina á tímalínunni en hér er hún minnkuð töluvert til að passa á þennan vef.

Wikivefur FB keyrir á Mediawiki lausninni sem er opinn hugbúnaður og vafalítið einna reyndastur wikilausna þar sem hann er grundvöllur Wikipedia alfræðiritsins. Í upphafi verður wikivefur FB fyrst og fremst opinn nemendum og kennurum FB, þ.e. hvað innsetningu og umsýslu efnis varðar. Ég er að ganga frá beintengingu við notendagrunn Moodle vefsins á dreifnam.is sem þýðir að notendur sem hafa aðgang að kennsluvef FB eru um leið með aðgang að wikivefnum.

Ég skoðaði ýmsar wikilausnir áður en ég ákvað að sættast á Mediawiki og nýtti mér í þeirri vinnu WikiMatrix sem er frábær vefur og einfaldaði vinnuna við ákvarðanatökuna mjög. Ég verð að segja að það er hreint með ólíkindum hversu margar wikilausnir er verið að þróa um þessar mundir. Ég var um hríð mjög spenntur fyrir Twiki en ákvað að Mediawiki skyldi það vera og réði þar miklu að um traust og þrautreynt kerfi er að ræða. Um tíma koma einnig til greina að nýta þjónustu eins og Wikispaces en þrátt fyrir ýmsa kosti hennar, s.s. mun notendavænni ritil, þá kýs ég nota hugbúnað sem þýddur hefur verið á íslensku ef þess er nokkur kostur.

Ég ákvað að klæða wikivefinn í búning svipaðan og www.dreifnam.is og bætti auk þess við nokkrum viðbótum (extensions) t.a.m. í því skyni að birta nýjustu og vinsælustu færslur notenda á forsíðu vefsins. Wikivefir eru sjaldnast eins skipulagðir og almennir vefir eða með hefðbundnum, útpældum leiðarkerfum og því mikilvægt að mínu mati að gefa notendum kost á að fylgjast með því helsta sem fram fer á forsíðunni. Síðar hef ég í huga að varpa efni úr wikivefnum yfir á námsumhverfið, s.s. yfirlit yfir nýtt efni á wikivefnum á forsíðu dreifnam.is.
 

Hér má sjá sýnishorn af verkefni sem einfalt er að búa til með aðstoð Quizlet.

Hér getur til að mynda að líta orðalista sem ég bjó til fyrir dóttur mína sem er að æfa sig undir próf í bókmenntum við Foldaskóla. Ég get vel ímyndað mér að Quizlet komi að góðum notum fyrir nemendur sem vilja æfa sig fyrir próf heima í tölvunni eða tölvuveri skólans. Kennarar gætu jafnvel látið nemendur vinna orðalista.

Frekari upplýsingar um Quizlet má finna á wikivef Fjölbrautaskólans í Breiðholti.

Greinarnar verða fyrst birtar á vef PennState háskólans en síðar færðar yfir á WikiEducator vefinn þar sem þær verða öllum opnar.

Viðburðurinn stendur til 27. júní nk. og eftirfarandi aðilar hafa boðað þátttöku sína. Athugið að vel má vera að fleiri bætist við þar sem enn er leitað eftir áhugasömu fagfólki:

Dagskráin hefst, eins og áður hefur verið sagt þann 12. mars, þegar birt verður viðtal við Ruth M. Sabean frá UCLA þar sem hún var m.a. ábyrg fyrir matsferlinu sem leiddi til þess að skólinn valdi að innleiða Moodle námsumhverfið. Dagskráin er enn ekki fullmótuð en hana má finna á vef verkefnisins. Í kjölfar Sabean kemur Richard Wiles og fjallar um nýjan eiginleika Moodle sem felst í því að frá og með útgáfu 1.8 (næstu útgáfu) verður hægt að tengja saman margar Moodle uppsetningar í eitt sveigjanlegt námsnet. Wiles mun einnig fjalla um Mahara eportfolio og tengt efni.

Það sem veldur mér helst áhyggjum hvað svona þjónustur varðar er að ég er ekki fullkomlega viss um að geta treyst þeim fyrir mikilvægu efni, eins og t.a.m. kennslugögnum. Tökum Scribd sem dæmi. Hvaða viðskiptahugmynd liggur svona vef til grundvallar? Ég kem ekki auga á neinar auglýsingar sem hugsanlega gætu aflað vefnum tekna. Maður hlítur því að spyrja sig hversu lengi lítil, kannski nýstofnuð fyrirtæki geta haldið úti ókeypis þjónustu sem grundvallast á mikilli bandvídd og miklu geymslumagni? Allt kostar þetta jú peninga. Get ég sem notandi átt von á því að einn góðanveðurdag þá vakni ég upp við að þjónustunni hefur verið lokað og allt mitt efni óaðgengilegt, glatað? Ég hef líka nokkrar áhyggjur af höfundarréttarmálum á Scribd. Svona við fyrstu sýn virðist ansi mikið af efni vefsins sent inn í óþökk höfundarrétthafa, s.s. heilu bækurnar um vefsmíðar, forritun eða myndvinnslu.

Annars verður bara að koma í ljós hvernig Scribd mun standa sig og þróast. Ég er spenntur fyrir þessari hugmynd og mun örugglega nýta mér Scribd í náinni framtíð. Vonandi erum við að sjá þarna vísi að öflugri þjónustu á Netinu. Það er aldrei að vita.

Tölfræði er kannski eitthvað sem maður svona fyrst í stað myndi ekki telja líklegt til vinsælda á Netinu, en Swivel er heillandi á sinn hátt og ég stóð sjálfan mig að því að kanna hin margvíslegustu gögn og tengslin á milli þeirra bara vegna þess að það bæði skemmtilegt og fróðlegt. Ég tók t.a.m. eftir því að Hjálmar Gíslason, höfundur Spurlsins, hefur sett inn gögn sem varða fólksfjöldaþróun á íslandi á árunum 1890 – 1990.

Swivel hefur upp á að bjóða eftirfarandi þjónustu og það án endurgjalds:

• Hægt er að skoða hvers kyns gögn sem notendur hafa sent inn. Gögnin má birta sem lista eða á myndrænu formi (gröf). Þau má einnig sækja yfir á eigin tölvu.
• Hægt er að bera saman ólík eða lík gagnasett og setja samanburðinn fram á myndrænan hátt.
• Hægt er að breyta birtingu gagna, s.s. framsetningarhætti eða fjölda.
• Notendur geta birt einstök gröf á eigin vefjum (sjá sýnishorn hér að neðan) eða sent vísanir á þau í tölvupósti.
• Notendur geta sent inn eigin gagnasett ásamt lýsingu og jafnvel táknrænni ljósmynd. Sjálfur prufaði ég að setja inn gögn sem tengjast skólastarfi og reyndist það lítið mál.

Swivel býður upp á óteljandi kosti í námi og kennslu og verður spennandi að nýta það í skólastarfi strax á næstu önn. Stærðfræði kemur fyrst í hugan en auðvitað er hægt að nýta svona þjónustu í fjölmörgun námsgreinum, s.s. sögu, félagsfræði og upplýsingatækni.

Ég á eftir að kynna mér kosti og galla Swivel miklu betur og hyggst gera það á næstunni. Ég sé mikla möguleika í vefþjónustu sem þessari en spyr mig einnig um áreiðanleika gagnanna sem þarna verða gerð aðgengileg. Þetta er að sjálfsögðu sama vandamálið og Wikipedia og önnur viðlíka samfélög á Netinu glíma við á hverjum degi. Frelsið er yndislegt en því fylgir gjarnan misnotkun.